மீனாவின் புகழ்!

2.4.2015 புதிய தலைமுறை ‘பெண்கள் டயரி’ பகுதியில் வெளிவந்த எனது கட்டுரை

அன்றுதான் புதிதாக வீட்டு வேலைக்குச் சேர்ந்திருந்தாள் மீனா. அன்றைய வேலைகளை முடித்துவிட்டு வந்தவள் சொன்னாள்: ‘பாத்ரூம்ல உட்கார்ந்துகொண்டு என்னால் பாத்திரங்கள் தேய்க்கமுடியாது. முதுகு வலி. அதனால் இங்க இருக்கற (ஹாலை ஒட்டி இருக்கும் பால்கனி) சிங்க்கில் நின்று கொண்டே தேய்க்கிறேன். அப்புறம்……இந்த சபீனா எல்லாம் யூஸ் பண்ண முடியாது. விம் லிக்விட் வாங்கிக் கொடுங்க…..’

 

வந்த அன்றே இத்தனை கறாராகப் பேசினால் என்ன செய்வது என்று யோசித்தபடியே இருந்தேன். வீட்டு வேலைக்கு உதவி இல்லாமல் இருக்க முடியாது. சரி வேறு வழியில்லை என்று நினைத்துக் கொண்டே விம் லிக்விட் வாங்கி வந்தேன். அடுத்த நாள் காலையில் மீனா வந்தவுடன், ‘சிங்கிலேயே தேய்த்து விடம்மா’ என்றேன். அவள் வேலையை முடித்துவிட்டுக் கிளம்பியவுடன் பாத்திரங்களை உள்ளே கொண்டு வர சிங்க் அருகே போனேன். ஒரு நிமிடம் என் கண்களை என்னாலேயே நம்ப முடியவில்லை. அசந்து போய் நின்று விட்டேன். பாத்திரங்கள் எல்லாம் பளபளவென்று மின்னின. சிங்க் சுத்தமாக கழுவப் பட்டு அதுவும் பளபள என்று மின்னியது. அதுமட்டுமல்ல; பாத்திரக்கூடையில் பாத்திரங்கள் எல்லாம் கவிழ்த்து வைக்கப்பட்டிருந்தன. கரண்டிகள் எல்லாம் அந்தக் கூடையில் அவற்றிற்கென இருந்த கொக்கியில் மாட்டப்பட்டிருந்தன. தட்டுகள் ஒரு பக்கமாக, ஸ்பூன்கள் ஒரு பக்கமாக என்று, எடுத்து அடுக்குவதற்குத் தோதாக பாத்திரக்கூடையில் எல்லாம் வைக்கப்பட்டிருந்தன. டிபன் பாக்ஸ்கள் தனித்தனியாக மூடிகளுடன் மேடை மேல் கவிழ்க்கப்பட்டிருந்தன.

 

‘எல்லாம் முதல் நாள்’ என்று நீங்கள் நினைப்பது போலத்தான் நானும் நினைத்தேன். ஆனால் தினமுமே இந்த ஒழுங்கு தொடர்ந்தது. அதேபோல அவளது நடை உடை பாவனைகள் எல்லாமே மெச்சும் வகையில் இருந்தது.

 

வெள்ளிக்கிழமை அன்று நீங்கள் மீனாவைப் பார்க்க வேண்டும். பளிச்சென்று தலைக்குக் குளித்து மஞ்சள் மின்னும் முகத்துடன் தலையில் கிள்ளு பூவுடன் மங்களகரமாக வருவாள்.

 

மீனாவின் இன்னொரு திறமையையும் சொல்ல வேண்டும். எல்லா மொழிகளையும் அனாயாசமாகப் பேசுவாள். கன்னடம், தெலுங்கு, தமிழ், ஹிந்தி என்று புகுந்து விளையாடுவாள். வீட்டில் ஆட்கள் அதிகம் வந்துவிட்டால் கடைசி பாத்திரம் விழும்வரை காத்திருந்து தேய்த்துக் கொடுத்துவிட்டுத்தான் போவாள். நிச்சயம் லீவு போடமாட்டாள்! எங்கள் அடுக்குமாடிக் கட்டிடத்தில் யார் வீட்டிற்காவது வேலையாள் வரவில்லையென்றால் மீனாவிற்குத்தான் அழைப்பு வரும். துளிக்கூட முகம் சிணுங்காமல் போய் செய்து கொடுத்துவிட்டு வருவாள். வீட்டு வேலை செய்வது தவிர தையல் வேலையும் செய்கிறாள் மீனா. நானும் எனது ரவிக்கை புடவைகளை அவளிடமே தைத்து வாங்கிக் கொள்ளுகிறேன். வெளியில் கொடுக்கும் அதே கூலியை மீனாவிற்கும் கொடுக்கிறேன்.

என்ன இப்படி ஒரேயடியாக உங்கள் வீட்டு உதவியாளைப் புகழ்கிறீர்கள் என்கிறீர்களா? சொல்லாமல் கொள்ளாமல் லீவு போடும், எத்தனை சம்பளம் கொடுத்தாலும் இன்னும் அதிகம் கொடுங்க என்று பாட்டு பாடும், தங்கள் கோபத்தை எல்லாம் நம் பாத்திர பண்டங்கள் மேலும், துணிகளின் மேலும் காட்டும் வேலையாட்கள் நிறைந்த இந்த காலத்தில் இப்படி ஒரு ஆள் கிடைக்க கொடுத்து வைத்திருக்க  வேண்டுமே!

 

மீனாவின் புகழ் சொல்லி மாளாது!