சந்தோஷமோ சந்தோஷம்!

 

காலையிலேருந்து எனக்கு சந்தோஷமோ சந்தோஷம்! எனக்கு வந்த ஒரு இமெயில் தான் என்னோட இத்தனை சந்தோஷத்திற்குக் காரணம் அப்படின்னா நீங்க நம்பணும், சரியா?

 

வயசாச்சுன்னா பாசஞ்ஜர் வண்டி மாதிரி மெதுவா ஆயிடறாங்க; அந்த வண்டி எப்படி ஒரு ஸ்டேஷன் விடாம நின்னு நின்னு மெதுவா போறதோ அதேபோல இவங்களும் ஒவ்வொண்ணுக்கும் நின்னு நின்னு மெதுவா யோசிச்சு யோசிச்சு….ஆ!  தாங்க முடியலடா சாமீ! ஆமை கூட இவங்களை தோற்கடிச்சுடும் அப்படின்னு எல்லாரும் சொல்றாங்க, இல்லையா? அது ஏன் அப்படின்னு அதாவது வயசானவங்க ஏன் slow coach ஆகறாங்கன்னு  ஒரு ஆராய்ச்சி பண்ணியிருக்காங்க. அதுல என்ன தெரிஞ்சுது அப்படின்னா வயசானவங்க புத்திசாலித்தனத்துல குறைஞ்சு போயிடறது இல்ல; அவங்க புத்தி கெட்டுப் போறதில்ல; அவங்களோட மூளையில எக்கசக்கமாக விவரங்கள் குமிஞ்சு கிடக்கறதால அவங்க யோசிக்க கொஞ்சம்(!!) அதீ…………..க நேரம் எடுத்துக்கறாங்க, அவ்வளவுதான். இத நான் சொல்லல. விஞ்ஞானிகள் ஆதார பூர்வமா சொல்றாங்க. என்ன ஆதாரம் அப்படின்னு கேட்கறவங்களுக்கு:

 

உங்களோட கணனி ஹார்ட் டிரைவ் ல விவரங்கள் அளவுக்கு அதிகமாக சேர்ந்துவிட்டால், அது எப்படி நீங்க கேட்கிற தகவலை எடுத்துக் கொடுக்கத் திணறுதோ அதேபோலத் தான் வயசானவங்களும். அவங்களோட மூளை தகவல்களால் நிரப்பப்பட்டு விடுவதால் நீங்கள் கேட்கிற கேள்விக்கு பதிலை தேட நேரம் எடுத்துக்கறாங்க. இத நீங்க தப்பா புரிஞ்சுக்கிட்டு, ‘வயசானாலும் ‘கெத்து’ போகல பாரு. ரத்தம் சுண்டிப் போனாலும் கொழுப்பு அடங்கல பாரு’, கேட்ட கேள்விக்கு பதில் சொன்னா என்ன? வாயில கொழுக்கட்டையா?’ அப்படின்னு எடுப்பு எடுக்கக்கூடாது.

 

இந்த மெத்தனம் புலனுணர்வு மெத்தனம் அல்ல. மனித மூளை வயதான காலத்தில் மெதுவாக வேலை செய்யக் காரணம் நாங்கள் அதிக அதிக விவரங்களை பலபல வருடங்களாக சேமித்து சேமித்து வைத்துக் கொள்ளுகிறோம். எங்களது மூளைகள் பலவீனமடைவதில்லை. மூளை மழுங்கி போச்சு, மூளைய கழட்டி வச்சுட்டீங்களா? ன்னு குத்தம் சொல்லக்கூடாது. இதற்கு நேர்மாறாக எங்களுக்கு அதிகம் தெரியும். அதிலேருந்து நீங்க கேட்குற ‘தம்மாத்துண்டு’ விவரத்த எடுத்துக் கொடுக்க வேணாமா? அது என்ன அவ்வளவு லேசுப்பட்ட காரியமா? அதான் லேட் ஆகிறது. அவ்வளவுதான்.

 

அதேபோல இன்னொன்று நாங்க திடீர்னு எழுந்து இன்னொரு அறைக்கு கனகாரியமாகப் போவோம். அங்கு போனவுடன் எதற்கு அங்கு வந்தோம் என்று இடுப்பில் கையை வைத்துக் கொண்டு மூளையை கசக்கிக் கொண்டு நிற்போம். நினைவிற்கே வராது. எதற்கு இங்கு நிற்கிறோம் என்று வியப்பாகக் கூட இருக்கும். முதல்ல உட்கார்ந்திருந்த இடத்துக்கு திரும்பி வந்தவுடனே ‘பளிச்’ என்று பல்பு எரியும். மறுபடி எழுந்து போய் அந்த வேலையை முடிச்சுட்டு வருவோம். இதற்குப் பெயர் ஞாபகமறதி இல்லை. இயற்கையே எங்களை அதிக உடற்பயிற்சி செய்ய வைப்பதற்காக ஆடும் கண்ணாமூச்சி ஆட்டம் இது. புரிகிறதா?

 

அதான்!

 

இந்த செய்தியை என்னோட எல்லா  நண்பர்களுக்கும் அனுப்ப ஆசைப்படுகிறேன். இதைப் படிச்சுட்டு அவங்களும் என்ன மாதிரியே சந்தோஷப்படுவாங்க இல்லையா? ஆனா எனக்கு அவா அத்தனை பேர்களோட பேரும் உடனே நினைவுக்கு வரல; அதனால ஒரு சின்ன உதவி பண்ணுங்களேன். உங்கள் நண்பர்களுக்கு இத அனுப்பிடுங்கோ. அவங்கள்ளாம் என்னோட நண்பர்களாகவும் இருக்கலாம், இல்லையா?

திருமதி மஞ்சுளா ரமேஷ் அவர்களின் சினேகிதி ஜூலை 2015 இதழில் வெளியாகியிருக்கும் என் கட்டுரை இது.

சர்வதேச யோகா தினம்

Published in 4tamilmedia.com on 21.6.2015  

இந்தியப் பிரதமர் திரு நரேந்திர மோதி கேட்டுக் கொண்டதற்கிணங்க, ஐக்கிய நாடுகள் சபை இந்த வருடம் முதல் ஒவ்வொரு வருடமும் ஜூன் 21 ஆம் தேதியை ‘சர்வதேச யோகா தின’மாக அறிவித்திருக்கிறது. இதன் காரணமான 6000 வருடப் பழமையான இந்த யோகக்கலை பல நாடுகளிலும் மக்களிடையே ஆரோக்கியத்திற்கான ஒரு விழிப்புணர்வை ஏற்படுத்தும் என்று எதிர்பார்க்கலாம். மனம், உடல், ஆத்மா ஆகிய மூன்றையும் வளப்படுத்தும் இந்தக் கலையை சர்வதேச யோகா தினத்தன்று இந்தியா முன் நின்று நடத்தும். அன்று காலை 7 மணி முதல் 7.35 மணிவரை சுமார் 50,000 மக்கள் பங்குபெறும் பிரம்மாண்ட யோகா முகாம் ராஜ்பத், புதுதில்லியில் நடைபெற உள்ளது.

 

இந்தியாவின் மாநில அரசுகளும், வெளிநாடுகளில் உள்ள இந்திய அமைப்புகளும் அவரவர் இடங்களில்  இதே போன்ற நிகழ்ச்சிகளை நடத்த இருக்கின்றன. மத்திய அரசு  152 நாடுகளின் அரசு அதிகாரிகளை இந்த மிகப்பெரிய நிகழ்விற்காக அழைத்துள்ளது. நியூயார்க் நகரின் டைம்ஸ் சதுக்கத்தில் ஐக்கிய நாடுகளின் நிகழ்ச்சிகள் காண்பிக்கப்படும்.

 

இந்தியா தனது பழம்பெருமை வாய்ந்த கலாச்சார தத்துவத்தை உலகிற்கு வெளிச்சம் போட்டுக் காட்ட இது ஒரு பொன்னான வாய்ப்பு. விஞ்ஞானத்தை அடிப்படையாகக் கொண்ட இந்த யோகா, நமது முன்னோர்கள் உலகிற்கு அளித்த கொடையாகும். யோகக்கலையின் மதிப்பும், அதனால் விளையும் நன்மைகளையும் உலக நாடுகளும் மெதுமெதுவே அறியத் தொடங்கியிருக்கிறன. இந்தக் கலையின் மூலம் உலக மக்களை குறைந்த செலவில் ஆரோக்கியமாக வாழ வைக்க முடியும் என்பதையும், பிற உடற்பயிற்சிகளைப் போல் இல்லாமல் யோகா மனதையும் உடலையும் இணைப்பதால் ஒட்டுமொத்த ஆரோக்கியத்துடன், ஆழ்மன அமைதியும் கிடைக்கிறது என்பதனையும் இந்த நாடுகள் உணர்ந்திருக்கின்றன.

 

யோகாவின் பெருமையை உணர்ந்தவர்கள் இந்த நாளை வரவேற்கும் வேளையில் சிலர் தங்களது அதிருப்தியை வெளிப்படுத்தி, அதை அரசியல் செய்யப் பார்ப்பது வருத்தத்திற்குரியது. மோதி அரசு தனது பெருமையை பறைசாற்ற இப்படிச் செய்கிறது என்று இவர்கள் சொல்லுகிறார்கள். சிறுபான்மை இனத்தை சேர்ந்தவர்கள் சிலர் யோகா என்பது எல்லோராலும் செய்யக்கூடிய ஒன்று அல்ல என்று முரண்பட்ட கருத்துக்களைச் சொல்லி வருகிறார்கள்.

 

யோகா என்பது வேத காலத்திற்கு முன்பிருந்தே இந்தியாவில் இருந்து வந்திருக்கிறது. நமது ஆளுமையை நமது வாழ்வின் எல்லா நிலையிலும் மேம்படுத்திக் கொண்டு, மனம், உடல் இரண்டாலும் இயற்கையுடன் ஒன்றிணைந்து வாழ்வது தான் யோகா. ஆரம்பத்தில் யோகா என்பது மதவாத மெய்யியல் அடிப்படையிலேயே பார்க்கப்பட்டது. ஸ்வாமி விவேகானந்தர் இந்தக் கலையை மேற்கத்திய நாடுகளில் அறிமுகம் செய்தார். 1980 களில் இது ஒரு உடற்பயிற்சி முறையாக மேற்கு நாடுகளில் பிரபலம் அடைந்தது.

 

இன்றும் பலருக்கு யோகா என்பது உடலை ஆரோக்கியமாக வைத்திருக்க உதவும் ஒரு உடற்பயிற்சி என்ற நிலையிலேயே தெரிந்திருக்கிறது. யோகாவை தினமும் செய்வதன் மூலம் ஒரு வலுவான, தன்னம்பிக்கை நிறைந்த உடலைப் பெறலாம் என்பதுடன் உளவியல், மற்றும் நரம்பியல் ரீதியாகவும் நன்மைகளைப் பெறலாம். நமது ஆழ்மன, அதாவது உள்ளுணர்வு  மற்றும் படைப்பாற்றல் சக்தியையும் மேம்படுத்த உதவுகிறது.

 

மேற்கு நாடுகளிலும் யோகாவை ஆரோக்கியத்தை வளப்படுத்தும் ஒரு வழியாகவே பார்க்கிறார்கள். ஆசனங்கள் செய்வதில் இருக்கும் ஆர்வம் இந்த நாடுகளின் மக்களுக்கு அதிகரித்து வந்தாலும் யோகாவின் ஆன்மீக, தத்துவார்த்தங்கள் அவர்களை இன்னும் அவ்வளவாகக் கவரவில்லை என்றே சொல்ல வேண்டும்.

 

யோகா என்பது மதங்களையும், கலாச்சாரங்களையும் தாண்டிய ஒரு ஆன்மீக பயிற்சியின் அவசியத்தை உணர்த்தும் உலகப் பொதுமொழி என்று அமெரிக்க அதிபர் பராக் ஒபாமா வலியுறுத்துகிறார்.

 

இந்தியாவில் யோகா என்பது வாழும் வழியாகப் பார்க்கப்படுகிறது. உலக ஆரோக்கிய நிறுவனம் இந்தியாவின் யோகா மையங்களுடன் சேர்ந்து அறிவியல் சான்றுகளுடன் யோகாவின் நன்மைகளை உலகெங்கும் பரப்புவதுடன், உலக மக்களின் ஆரோக்கியத்திற்கு யோகாவை பயன்படுத்தவும் திட்டமிட்டிருக்கிறது. பலவிதமான நோய்கள் மக்களை அண்டாமல் தடுக்கவும், அவற்றைக் கட்டுப்படுத்தவும் யோகா முழுமையான சிகிச்சை முறையாக உலகெங்கும் அறியப்பட்டு வருகிறது.

 

 

மருத்துவ அறிவியலில் எத்தனையோ முன்னேற்றங்கள் ஏற்பட்டிருந்தாலும், நவீன மருத்துவம் பொதுமக்களிடையே ஓரளவிற்கே வெற்றி பெற முடிகிறது. ஏனெனில் மனிதனை மருத்துவப் பார்வையிலேயே அது பார்க்கிறது. மனிதனின் உளநலத்தையும், உளவியல் சார்ந்த எண்ணங்களையும், ஆன்மீக அம்சங்களையும் அது ஒதுக்கிவிட்டு அவனை ஒரு உயிரியல் பொருளாக மட்டுமே பார்க்கிறது.

 

‘நம்மால் ஒவ்வொரு மனிதனுக்கும் தேவையான போஷாக்கினையும், உடற்பயிற்சியையும் கொடுக்க முடிந்தால், ஆரோக்கியத்திற்கு பாதுகாப்பான வழியை கண்டுபிடித்திருக்க முடியும்’ என்று கிரேக்க மருத்துவ வல்லுநர் ஹிப்போகிரேட்ஸ் சொல்லுவார். யோகாசனங்கள் நமது ஆரோக்கியத்தை காக்கும் சிறந்த வழி என்று சொல்லலாம்.

 

பிராணவாயுவை உள்ளிழுக்க நமது நுரையீரலின் சக்தியைப் பெருக்கவும், இரத்தத்தை உடலெங்கும் கொண்டு செல்லும் இதயத்தின் இயக்கத்தை வலுப்படுத்தவும், இன்சுலினை சுரக்க கணயத்தை வலுப்படுத்தவும் ஆசனங்கள் உதவுகின்றன. அத்துடன் நமது வளர்சிதை மாற்றத்தை பலப்படுத்தவும், நோய் எதிர்ப்பு சக்தியையும் அதிகரிக்கவும் யோகாசனப் பயிற்சிகள் உதவுகின்றன.

 

ஆழ்ந்த மூச்சுப்பயிற்சியும், ஆசனங்களும் யோகாவின் ஆரம்பநிலைதான். ஆழ்மனப் பயிற்சி, குண்டலினியை எழும்பச் செய்தல், மற்றும் சமாதி ஆகியவை நம்மை உயர்நிலைக்கு அழைத்துச் செல்பவை. இந்த மேம்பட்ட  யோகாப்பயிற்சி மனிதனை அவனது ஆழ்மனத்துடன் ஒன்றச் செய்யும். ‘அடிக்கடி பழைய சம்பவங்களை நினைத்து அல்லலுறும் மனிதனை நிகழ்காலத்தில் வாழச்செய்து, வாழ்க்கையை பயமில்லாமல் எதிர்கொள்ள வைக்கும் யோகா. எதிர்காலம் பற்றிய நம்பிக்கையுடன், நேர் எண்ணங்களை மனதில் தோன்றச் செய்யும்’ என்கிறார் ஜப்பானிய யோகா ஆசிரியர் எச். இ. தவே.

 

யோகாப் பயிற்சிகளை மேற்கொள்வதால் நமது அகந்தை அழிந்து, மற்றவர்களின் மேல் அன்பு செலுத்தவும், மற்றவர்களைப் பார்த்து பொறாமைப்படாத நிலையும், கடவுளின் ஆசியும் கிடைக்கும். மனதில் குழப்பமில்லாத அமைதி, நல்லது செய்வதில் ஒரு இன்பம், தீயவர்களைப் பொருட்படுத்தாமை ஆகியவை யோகப்பியாசத்தால் நமக்குக் கிடைக்கும் நன்மைகள்.

 

‘நமது சிக்கல்கள் நிறைந்த உடலானது மிதமிஞ்சிய செயல்முறைகளை  கொண்டது. நமக்கு இறைவனால் அளிக்கப்பட வரம் இந்த உடல். இதனை நல்ல ஆரோக்கியத்துடனும், கட்டமைப்புடனும் வைத்துக் கொண்டாலொழிய நமது மனம் தெளிவாகவும், உறுதியாகவும் இருக்க இயலாது’ என்பார் புத்தர். யோகாவினால் புத்தர் கூறும் உடல்நலத்தைப் பெறலாம்.

 

உடலின் திறன்கள் பெருகப் பெருக நமது சக்தி பெருகுகிறது. இதனால் நாம் செய்யும் வேலைகளின் தன்மை உயருகிறது. நமக்குள் மறைந்திருக்கும் திறமைகளை வெளிக்கொணர்ந்து, சோம்பலை ஒழித்து, வாழ்வில் மகிழ்ச்சியை காண நாள்தோறும் செய்வோம் யோகப் பயிற்சிகளை.

 

சர்வதேச யோகா தின வாழ்த்துக்கள்!