Uncategorized

சாவியின் விசிறி வாழை

நேற்று ஒரு நண்பரிடமிருந்து வந்த மின்னஞ்சல் இது:

அன்பு வணக்கம். நலம் என நம்புகிறேன்.

விசிறி வாழை நாவலை ஒரே மூச்சில், படு வேகமாக வாசித்து முடித்தேன்.அலையோசை, குறிஞ்சி மலர் கொடுத்த அதே கனத்தை, ரணத்தை உணர்ந்தேன்.

உங்களுக்கு மிக பிடித்த நாவல் இது தான் என்று அறிவேன். ஏன் என்று காரணம் தெரிந்து கொள்ள ஆவலாக உள்ளேன். இதனை பற்றி பதிவு ஏதும் எழுதி ஊள்ளீர்களா? இருந்தால் சுட்டி தரவும்

அன்புடன்,

……………..

என்று முடித்திருந்தார். இந்த நாவலை சிலமுறை படித்திருந்தாலும் பதிவு எதுவும் எழுதியதில்லை.

விசிறி வாழை நாவல் எந்த வருடம் வந்தது என்று நினைவில்லை. ஆனால் விகடனில் தொடராக வந்து கொண்டிருந்தபோதே படித்திருக்கிறேன். அப்போது புரியாத சில விஷயங்கள் இப்போது படிக்கும்போது புரிகிறது. பல வருடங்களுக்குப் பின் இந்த புத்தகத்தின் pdf கிடைத்தது. இதை அனுப்பியவரும் மேற்கண்ட மின்னஞ்சலை அனுப்பியவர்தான் –  எனது பிறந்த நாளைக்கென்று தனது பரிசாக இந்தக் கதையின் pdf அனுப்பியிருந்தார்.

இந்தக் கதையின் கதாநாயகி பார்வதி முதிர்கன்னி. சிறுவயதிலேயே அம்மா அப்பாவை இழந்து ஒரே அண்ணனின் குழந்தையை (அண்ணா-அண்ணியின் மறைவிற்குப் பிறகு) தன் குழந்தையாக வளர்த்து வருபவள். தான் படித்த கல்லூரியிலேயே வேலைக்கு சேர்ந்து இன்று அதன் பிரின்சிபால் ஆக இருப்பவள். கல்லூரியின் புதிய ஹாஸ்டல் கட்டிடத்தை திறந்து வைக்க வரும் சேதுபதியின் மேல் ஒருவித ஈர்ப்பு ஏற்படுகிறது.

இனி நண்பருக்கு நான் எழுதிய பதில்:

இந்தக் கதையில் இருவகையான காதல் வருகிறது. ஒன்று இளம் நெஞ்சங்களில்  – பாரதிக்கும் ராஜாவுக்குமிடையில் மலருவது. இன்னொன்று பார்வதியின் நெஞ்சில் சேதுபதியின் நினைவாகத் தோன்றுவது. இந்த வயதான பருவத்தில் மலரும் காதலை துளிக்கூட விரசம் என்பது இல்லாமல் சாவி சொல்லியிருப்பார். சேதுபதியின் பெயரைக் கேட்கும்போதெல்லாம், அவரைப் பார்க்கும்போதெல்லாம் பார்வதியின் உள்ளம் துடிக்கும். வியர்த்துப் போவாள். ஆனால் நமது நெஞ்சில் அவளைப் பற்றி ஒரு ‘ஐயோ பாவம்’ உணர்ச்சி மட்டுமே ஏற்படும்.

முதலிலிருந்தே பார்வதியைப் பற்றி நமக்கு உயர்ந்த எண்ணம் வரவேண்டுமென்று அவர்களது வீட்டில் ராமகிருஷ்ண பரமஹம்சரின் போட்டோ, சாரதா தேவியின் போட்டோ மாட்டியிருக்கும் என்று சொல்லிக்கொண்டு போவார் சாவி. தனது உயர்ந்த எண்ணங்களை (குறிக்கோள்களை நிறைவேற்ற) மற்ற இன்பங்களை துறந்துவிட்டவள். அப்படிப்பட்டவளுக்கு சேதுபதியின் மேல் ஏன் ஒரு ஆசை? 46 வயதானவள் நெஞ்சில் தோன்றும் இந்த ஆசை என்ன மாதிரியானது? கடைசிப் பக்கம் படித்துவிட்டு நிமிரும்போது நம் மனதில் பார்வதி அழுத்தமாக வந்து உட்கார்ந்து கொள்ளுவாள்.

சேதுபதிக்கும் பார்வதியின் மேல் ஒரு ஈர்ப்பு ஏற்படும். இருவரும் தங்கள் உணர்ச்சிகளை வெளிக்காட்டாமல் தவிப்பது கூட ரொம்பவும் decent ஆகச் சொல்லப்பட்டிருக்கும். உண்மையில் இந்தக் கதை ‘சேவற்கொடியோன்’ கொடுத்த கதைக் கருவை வைத்துக் கொண்டு தான் எழுதியது என்று கதையின் கடைசியில் சாவி சொல்லியிருப்பார். சேவற்கொடியோன் இந்தக் கருவை சாவியிடம் சொல்லிவிட்டு தன்னால் இதுபோல ஒரு கருவை வைத்து எழுதமுடியாது என்றும், சாவியோ, அல்லது ஜெயகாந்தனோ எழுத வேண்டும் என்று தான் விரும்புவதாகவும் சொன்னாராம். ஜெயகாந்தன் எழுதியிருந்தால் எப்படி இருந்திருக்கும் என்று யோசித்துப் பார்ப்பேன்.

ஜெயகாந்தனின் ‘கருணையினால் அல்ல’ படித்திருக்கிறீர்களா? கிட்டத்தட்ட இதேபோல இருக்கும். வயதான இருவருக்கு இடையில் வரும் காதல். கிடைத்தால் படித்துப் பாருங்கள்.

இப்போதெல்லாம் இந்த மாதிரியான அழுத்தமான கதைகளை யாரும் எழுதுவதில்லை.

இந்தக் கதையைப் பற்றிப் பேச ஒரு வாய்ப்பு கொடுத்திருக்கிறீர்கள். நன்றி.

நண்பரின் பதில்:

வணக்கம்

இது ஒரு Tragedy நாடகமாக இருக்காது என்று முதலில் நம்பினேன். பின் அசந்தே போனேன்…

நாலே பாத்திரங்களை வைத்து கொண்டு என்ன ஒரு விந்தை செய்துள்ளார் சாவி. பலவகையான கருத்துகளை நாசுக்காக அங்கங்கே பொதிந்து வைத்துள்ளார். மதிப்பும் மரியாதையும் உள்ள மனிதர்களை பற்றி படிக்கும் போது எவ்வளவு மகிழ்ச்சியாக உள்ளது.

எழுத்து நடையில் என்னை கவர்ந்தது : ஒரு சம்பவம் நடந்த உடன், இருவரின் மனநிலைகளையும் தெளிவுர, மிகவும் சரியாக எழுத்தில் வடித்துள்ள விதம் தான்!

விரசமில்லா காதல் தான் வசந்த காலத்தின் அறிகுறி.

ஜெயகாந்தனின் அந்த புத்தகத்தை படித்தில்லை. அவர் கருவை இவ்வளவு இலகுவாக சொல்லி முடிப்பாரா என சிந்திக்கிறேன்…

இப்பொழுது இது போன்ற கதைகள் வருகிறதா என்ற கேள்வி ஒருபுறம் இருக்கட்டும். வாசகர்கள் உள்ளார்களா ?

இது எல்லாம் நமக்கு எதுக்கு, படிக்க (இது போன்ற) பிரசித்தி பெற்ற நாவல்கள் கடல் போல், ஏற்கனவே உள்ளது, முத்தெடுத்து மகிழ்வோம் !

அன்புடன்,

இந்தப் பதிவைப் படிக்கும் வலைபதிவாளர்களுக்கும் ஒரு வேண்டுகோள்: ஒருமுறை விசிறி வாழை படித்துப் பாருங்களேன்.

விசிறி வாழை PDF நூலின் official பிரதிhttp://tamilvu.org/library/nationalized/pdf/87-saavi/visirevalzai.pdf.

நன்றி ஓஜஸ்!

30 thoughts on “சாவியின் விசிறி வாழை

  1. கருணையினால் அல்ல ….டைபிஸ்ட்-விரல்களை பற்றி எழுதும் போது ,சாதாரண நிலையில்
    5 ஒடிசலான விரல்களும் ஒன்றோடொன்று பிணைந்து ஓர் முடிச்சு போல் இருக்கும்
    …டைப் செய்யும் போது மட்டும் பிரிந்து எழுத்தை தட்டியபின் மீண்டும்
    முடிச்சோடு ஒட்டிக்கொள்ளும் என்று சொல்லும்போது ,நம் விரல்கள் வலிக்கும்
    …திருமதி சிவசங்கரி அவர்கள் தன் வீட்டு வளர்ப்பு நாய் இறந்து போனது பற்றி
    எழுதினார்…சுவையாகவே இருந்தது …அப்போ விகடனுக்கு ஒரு வாசகர் கோவமாக
    எழுதினார் ,”பெரிய எழுத்தாளர் என்றால் அவர்கள் வீட்டு பால் கணக்கு,லாண்டரி
    கணக்குகளை எல்லாம் நாங்கள் படிக்க வேண்டுமா?-என்று மறு வாரம் நான் எழுதினேன்
    ,எதாக இருந்தால் என்ன ?சுவையாக இருந்தால் படிக்கலாமே என்று …சிவசங்கரி என்னை
    பாராட்டி கடிதம் எழுதினார்கள் ….
    நண்பர் கூறுவது போல் ,தரமான எழுத்தாளர்கள் இல்லாமல் இல்லை …வாசகர்கள் தான்
    இல்லை …எது போல என்றால் ,

    “கோடி கணக்கான இரண்யர்கள் வாழ்கிறார்கள் ….
    நரசிம்மன் இதுவரை தோன்றாதது ஏன்????…காரணம்
    நம்மிடையே ஒரு பிரகலாதன் கூட இல்லை என்பதே “

    1. வாங்க வேணுகோபால் ஸார்!
      முதலியாரின் விரல்களைப் பற்றி ஜெயகாந்தன் எழுதியது அந்த வரிகள். சமீபத்தில் இந்தக் கதையைப் படித்ததால் நன்றாக நினைவில் இருக்கிறது.

      எழுத்தாளர் சுஜாதா இதேபோல நான் லாண்டரி கணக்கு எழுதினால் கூட படிப்பதற்கு ஆட்கள் இருக்கிறார்கள் என்று சொல்லி வாங்கிக்கட்டிக் கொண்டதும் நினைவுக்கு வருகிறது.
      அந்தகாலம் போல வாசகர்களுக்கும், எழுத்தாளர்களுக்குமிடையில் அத்தனை நெருக்கம் இப்போது இல்லையோ என்று தோன்றுகிறது. நீங்கள் எழுதிய கடிதம் சிவசங்கரி வரை போயிருக்கிறதே!
      //“கோடி கணக்கான இரண்யர்கள் வாழ்கிறார்கள் ….
      நரசிம்மன் இதுவரை தோன்றாதது ஏன்????…காரணம்
      நம்மிடையே ஒரு பிரகலாதன் கூட இல்லை என்பதே “//
      ரொம்பவும் நல்ல கருத்து.

      வருகைக்கும், சுவையான மலரும் நினைவுகளுடன் கூடிய கருத்துரைக்கும் நன்றி!

  2. அப்பாடி…. படித்து எவ்வளவு காலம் ஆச்சு! சிறு வயதில் படித்தது. சமீபத்தில்தான் மதுரையிலிருந்து கடத்தி சென்னை கொண்டுவந்தேன். அந்தக்கால பைண்டிங். மறுபடியும் படிக்க வேண்டும் என்று நினைத்துக்கொண்டே இருக்கிறேன். கருணையினால் அல்ல உள்ளிட்ட ஜெயகாந்தன் முத்திரைக்கதைகள் பைண்டிங்கும் அப்படியே.

    1. வாங்க ஸ்ரீராம்!
      அந்தக் காலத்துக் கதைகள் எத்தனை சந்தோஷத்தைக் கொடுக்கின்றன, இல்லையா?
      ஜெயகாந்தனின் குறுநாவல்கள் அந்தக் காலத்தில் வந்தது போலவே – கோபுலுவின் படங்களுடன், அந்தக் காலத்து ஜோக்குகள், விளம்பரங்கள் உடன் விகடன் பதிப்பகத்தாரால் மறுபடி பதிப்பிக்கப்பட்டுள்ளது. அக்கா வீட்டில் இந்தக் கதைகளைப் படித்தேன்.
      கோபுலுவின் படங்களைப் பற்றி என்ன சொல்ல? கதை மாந்தர்களைக் கண்முன் கொண்டுவந்து நிறுத்திவிடுகிறார்! எழுத்தாளர், ஓவியர் என்று இதுபோல ஒரு காபினேஷன் இனி கிடைக்குமா?
      வருகைக்கும், கருத்துரைக்கும் நன்றி!

    1. வாங்க தனபாலன்!
      திரு ஓஜஸ் சரியான இணைப்பு கொடுத்திருக்கிறார், பாருங்கள். அதை தரவிறக்கிக் கொள்ளுங்கள்.
      வருகைக்கும், கருத்துரைக்கும் நன்றி!

  3. மாமி,

    அருமையான பதிவு

    விசிறி வாழை PDF நூலின் official பிரதி http://tamilvu.org/library/nationalized/pdf/87-saavi/visirevalzai.pdf – please update this into your blog🙂

    இந்த நாவல் நாட்டுடைமையாக்கப்பட்ட நூல், எனவே தமிழ் இணைய பல்கலைகழகத்தில் உள்ளது. மேலே உள்ளது அதன் சுட்டியே🙂

    1. வாங்க ஓஜஸ்!
      பதிவுக்கு விஷயம் கொடுத்ததற்கு நன்றி!
      பதிவில் நீங்கள் கொடுத்திருக்கும் இணைப்பை சேர்த்துவிட்டேன்.
      வருகைக்கும், இணைப்பு கொடுத்ததற்கும் நன்றி!

  4. மொபைலிலிலிருந்து பின்னூட்டமிட்டால் வர்ட்பிரஸ்ஸில் ஒரு பிரச்னை. Notify me of new comments டிக் செய்தாலும் மெயில் பாக்ஸுக்கு வராது!

  5. விசிறி வாழை பெயரைப் பார்த்ததுமே அதற்கு கோபுலு வரைந்த முழுப்பக்கக் கோட்டுச் சித்திரங்கள் ஞாபகத்தில் வருது. அந்தக்கால விகடன் பத்திரிகையில் தொடர்கதை வரும் பக்கங்களில் இடப்பக்கமாகப் பார்வதியின் படமும் அதற்கு நேர் எதிரே சேதுபதியின் படமும் வரையப்பட்டிருக்கும். இருவரும் ஒருவரை ஒருவர் அன்பு ததும்பப் பார்த்துக்கொள்வதை அந்தப் படத்திலிருந்தே உணர முடியும். படத்தின் மூலம் கதை சொல்லும் திறமை வாய்ந்த கோபுலுவும் இன்று இல்லை; எழுதிய சாவியும் இன்று இல்லை! சாவியின் “வழிப்போக்கன்” படித்திருக்கிறீர்களா? கிட்டத்தட்ட அவருடைய சொந்தக்கதை என்பார்கள்.

    1. வாங்க கீதா!
      சாவியும், கோபுலுவும் பிரமாதமான காம்பினேஷன்! இருவரும் இன்று இல்லை என்கிற நிஜம் கொஞ்சம் வருத்தத்தைக் கொடுக்கிறது.
      ‘வழிப்போக்கன்’ படித்திருக்கிறேன். ஆனால் அத்தனை நினைவில் இல்லை. அம்மாவிடம் புத்தகம் இருக்கிறதா என்று கேட்க வேண்டும். சமீபத்தில் படித்த இன்னொரு பழைய புத்தகம் அனுத்தமாவின் ‘வேப்பமரத்து பங்களா’.
      நீங்கள் படித்திருக்கிறீர்களா?
      வருகைக்கும், கருத்துரைக்கும் நன்றி!

  6. மறுபடியும் வர்ட்பிரஸ் பற்றி ஒரு புகார்! சமீப காலங்களில் இங்கு வரும் பின்னூட்டங்கள் (அனைத்தும் அல்ல) நிறைய சீன மொழி போல மெயில் பாக்ஸுக்கு வருகிறது. உதாரணமாக கீதா மேடம் பின்னூட்டம். அது அவரவர்கள் உபயோகிக்கும் தமிழ்ச் செயலி காரணமோ என்னவோ!

  7. வேறே ஃபான்டிலே வருது. ஆனால் மொழி மாற்றம் செய்ய முடியலை. பின்னூட்டங்களையோ ரஞ்சனி அவற்றுக்கு அளிக்கும் பதிலையோ படிக்கணும்னா இங்கே தான் வர வேண்டி இருக்கு. சுரதாகாமில் போய் மொழி மாற்றம் செய்து பார்த்தேன். வேலைக்கு ஆகலை. ஆகவே இது இணையத் தொழில் நுட்பம் அல்லது வேர்ட் பிரஸின் செர்வர் தொழில் நுட்பம் காரணமாக இருக்கலாம். நான் எனக்குத் தான் வருதுனு நினைச்சுண்டு இத்தனை நாட்களாச் சொல்லலை!🙂 ஏன்னா நான் ஒரு weird ஜன்மா ஆச்சே! ::)

  8. உங்களோடது முன்னால் போட்டவை எல்லாம் வேறே ஃபான்டிலும், இப்போக் கொடுத்திருக்கிறது சரியாவும் இருக்கு (என்னோட மெயில் பாக்சிலே. )

  9. ஸ்ரீராம், கீதா,
    ஏன் எப்படி ஆகிறது என்று தெரியவில்லை. நான் ப்ளாக்ஸ்பாட்டிற்கு மாற வேண்டிய காலம் வந்துவிட்டதோ?

  10. ரஞ்சனி, நீங்கள் கொடுத்திருக்கும் பதில்களில் கடைசி பதிலைத் தவிர மற்றவை வேறே ஃபான்டில் தெரிகிறது. கடைசி மட்டும் நன்றாகத் தெரிகிறது.

  11. எனக்கு வேலை செய்கிறதே. இந்தச் சுட்டியை க்ளிக் செய்தவுடன் டவுன்லோட் ஆக ஆரம்பிக்கும். பிறகுதான் படிக்க முடியும்.
    முயற்சி செய்து பாருங்கள், இன்னொருமுறை.

    1. நிறைய பேர்கள் டவுன்லோட் செய்துகொண்டிருக்கிறார்கள்.
      உங்களுக்கு நான் தனிமடல் மூலம் இணைப்பு அனுப்புகிறேன். திறக்கிறதா என்று பாருங்கள்.

    1. வாங்க பாண்டியன்!
      நிச்சயம் படிக்க வேண்டிய புத்தகம். டவுன்லோட் செய்துகொண்டு படித்துப் பாருங்கள்.
      வருகைக்கும், கருத்துரைக்கும் நன்றி.

  12. அருமையான பகிர்வு…

    விசிறி வாழை யை தரவிறக்கம் செய்துவிட்டேன்….விரைவில் வாசிக்கணும்…

    பதிவிற்கும்.. சுட்டிக்கும் மிகவும் நன்றி…

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s