Uncategorized

அ. அ. தோசை 4

 

படம் முடிந்து திரும்ப அகம் வருகையில் ‘மன்னி, நீங்க இதுபோல கொட்டாய்-ல சினிமா பார்த்ததில்லையா?’ இந்தக் கேள்வி வரும் என்று நினைத்தேன். அதேபோல வந்தது.

 

‘ஊம், பார்த்திருக்கிறேனே! சீரங்கத்தில தேவி டாக்கீஸ், ரங்கராஜா டாக்கீஸ்  அப்படின்னு இரண்டு இருக்கு. பேருதான் டாக்கீஸ்.  உள்ள போனா இப்படித்தான் இருக்கும்.’

 

வாண்டுகளுக்கு ஒரே சந்தோஷம். ‘அப்ப நீங்க மெட்ராஸ் இல்லையா? சீரங்கமா?

 

‘மக்கு, மக்கு, மன்னி மெட்ராஸ் தான். சீரங்கத்துக்கு வரும்போது கொட்டாய்-ல சினிமா பார்த்திருக்கா! இல்ல மன்னி?’

 

கேள்வி-பதில் எல்லாம் அவர்களுக்குள்ளேயே!

‘என்ன சினிமா மன்னி?’

‘பார்த்தால் பசி தீரும், அப்புறம்…….ஆங்….! வீரபாண்டிய கட்டபொம்மன். எங்க பாட்டியோட வருவோம். பாட்டி சேர் டிக்கட் எல்லாம் வாங்கமாட்டா. தரை தான். எங்களுக்கு சாப்பிட முறுக்கு, பர்பி எல்லாம் கொண்டுவருவா….!’

‘வீரபாண்டிய கட்டபொம்மனா? எந்த வருஷம்?’

‘வருஷம் நினைவில்ல. ஆனா நா ரொம்ப சின்னவ….. ஜக்கம்மா, ஜக்கம்மா என்று சிவாஜி சத்தம்போடும் போதெல்லாம் பாட்டி மடில  படுத்துண்டுடுவேன்……பெரிசா ஜக்கம்மா முகம் வரும். நாக்க தொங்க போட்டுண்டு…..! ஜக்கம்மா போயிட்டா அப்படின்னு பாட்டி சொன்னவுடனேதான் படத்தை பார்ப்பேன்…..!’

நண்டுசிண்டுகள் ‘கிளுகிளு’ வென்று சிரித்தன.

‘அப்போ ஒரு வேடிக்கை நடந்தது சொல்லட்டுமா?’ என்றேன்.

‘சொல்லுங்கோ, சொல்லுங்கோ…!’

‘வீரபாண்டிய கட்டபொம்மன் படத்தைப் பார்த்துட்டு வந்து கொஞ்சநாள்ல இன்னொரு சினிமா போனோம். அதுலயும் சிவாஜிதான் ஹீரோ. எங்களோட கூட ரெண்டுபடத்துக்கும், எங்க உறவுக்காரப் பையன் வந்திருந்தான். இந்த இன்னொரு படத்துல சிவாஜி வந்தவுடனே ‘வீரபாண்டியன் படத்துல இந்த மாமாவ தூக்குல போட்டாளே…இப்போ எப்படி இந்த படத்துல வந்தா?’ அப்படின்னு கேட்டான் பாரு. தியேட்டர்லேயே! எங்களுக்கெல்லாம் சிரிப்பு தாங்கல…..’பக்’குனு சிரிச்சுட்டோம்.’

‘அப்புறம்?’

‘அவனுக்கு ஒரே கோவம். ‘நான் நன்னா பாத்தேன். இந்த மாமா கழுத்துல கயத்த மாட்டி மரத்து மேல இழுத்துட்டா. இந்த மாமா அப்படியே தொங்கினா’ என்று சொல்லிண்டே ‘ஓ’ன்னு அழ ஆரம்பிச்சுட்டான். எங்க பாட்டி அவன ரொம்ப பாடுபட்டு சமாதானப்படுத்தினா. பாவம் பாட்டி, அவன சமாதனப்படுத்தறதுல சினிமா பாக்கவே முயடியல’.

குழந்தைகளோட குழந்தையா நானும் பேசிண்டே வர அகம் வந்துடுத்து. ஆஹா! அடுத்த என்கௌண்டர் அடுக்கு தோசையுடன் தான் என்று நினைத்துக் கொண்டே மித்தத்துல (முற்றம்) போயி கால அலம்பிண்டு வந்தேன். நான்கு வீடுகளுக்கும் பொதுவாக அந்த மித்தம். (சீவா சித்தியின் பாஷையில் முற்றம் மித்தம் ஆகியிருந்தது.

எல்லோருக்கும் வாழலை சருகு போட்டு அடுக்கு தோசை போட ஆரம்பித்தார் சீவா சித்தி. ‘சித்தி ஒண்ணு போரும்’ என்றேன்.

 

‘ஒண்ணு எப்படிடி போரும். ரெண்டு போட்டுக்கோ’ என்றார் சித்தி. ‘கிட்டத்தட்ட 2 மைல் நடந்து வந்துருக்க…. நன்னா சாப்பிடு. அப்புறம் ராத்திரி பசிக்கும்’ என்று அருமை அருமையாக உபசாரம் செய்தார் சித்தி. கார்த்தால பண்ணின கொழம்பு, அப்புறம் மிளகாய்பொடி எண்ணெய். தம்ளர்ல மோரு. நல்ல பசி. மத்தியானம் சாப்பிட்டது.

சும்மா சொல்லக்கூடாது. தோசை பார்க்க தடிதடியாக இருந்தாலும் மெத்மெத்தென்று வாயில் கரைந்தது. என் பெண்ணிற்கும் அரைதோசை ஊட்டினேன்.

எல்லோரும் சாப்பிட்டு முடிந்ததும் சித்தி பாத்திரம் தேய்க்க ஆரம்பித்தார். ‘நான் தேய்ச்சு தரேன் சித்தி’ என்றேன். ‘நீ என்னிக்கோ வர. அதுவும் மெட்ராஸ் மாட்டுபொண்ணு. உன்ன வேல வாங்குவாளா?’ என்றார் சிரித்துக்கொண்டே. ‘பரவாயில்ல சித்தி. நான் நன்னா தேய்ப்பேன்’ என்றேன்.

‘உன்னோட சமத்தெல்லாம் தெரியும்டி எனக்கு. அப்படி உக்காந்துண்டு பேசிண்டிரு. நான் ‘கிடுகிடு’ன்னு முடிச்சுட்டு வந்துடறேன்’ என்றார் சித்தி. எங்கள் அரட்டைக் கச்சேரி நடந்துண்டு இருக்கும்போது என் பெண் வந்தாள். ‘அம்மா தொப்ப வலிக்கறது’

‘சித்தி லெட்ரீன் எங்கருக்கு. இவளுக்கு தொப்ப வலின்னா டூ பாத்ரூம் போகணும்னு அர்த்தம்’ என்றேன்.

சித்தி தன் பெண்ணைக் கூப்பிட்டார். ‘அந்த காடா விளக்கை எடுத்துண்டு மன்னி கூட போ. குழந்தை ‘வெளிக்கி’ போகணுமாம்’ என்றார்.

காடா விளக்கா? ‘லெட்ரீன்ல விளக்கு இல்லையா?’ என்றேன்.

‘இங்க எதுடி லெட்ரீன்?’ என்ன சொல்ல வருகிறார். சட்டென்று புரியவும், எனக்கு உள்ளுக்குள் பதைபதைத்தது. எப்படி இந்த ராக்ஷசிய சமாளிப்பேன்? ஆயிரத்தெட்டு கேள்வி கேக்குமே!

 

(தொடரும்)

 

 

 

Advertisements

22 thoughts on “அ. அ. தோசை 4

  1. //இங்க எதுடி லெட்ரீன்?’ என்ன சொல்ல வருகிறார். சட்டென்று புரியவும், எனக்கு உள்ளுக்குள் பதைபதைத்தது. எப்படி இந்த ராக்ஷசிய சமாளிப்பேன்? ஆயிரத்தெட்டு கேள்வி கேக்குமே!//

    ஹா,ஹாஹா, ஹாஹா, ஹா! இதெல்லாம் ஒண்ணுமே இல்லையாக்கும். தாலி கட்டிண்ட மறுநாளே கும்பகோணம் பக்கத்து கிராமம் ஆன எங்க புக்ககத்துக்குப் போயாச்சு. அங்கே கழிவறைக்குப் போகணும்னா வீட்டுக்குஎதிரே இருக்கும் மாமனாரின் தோட்டத்துக்குத் தான் போகணும். அங்கே போறதுக்கும் ஏகக் கட்டுப்பாடுகள். நான் புது நாட்டுப் பெண் என்பதால் தனியாக எல்லாம் வாசலுக்கு வந்து நான் பாட்டுக்குப் போக முடியாது. யாரானும் துணைக்கு வரணும். அவங்களுக்கும் அப்போ இயற்கை உபாதை இருந்தால் தான் வருவாங்க. இல்லைனா கொஞ்சம் பொறுத்துக்கோனு சொல்லிடுவாங்க. அது மட்டும் இல்லை. வாசலில் ஆண்கள் திண்ணையில் உட்கார்ந்து வம்பு பேசிக் கொண்டிருப்பார்கள். அப்போ நாம வெளியே செல்வது கூடாது. “புருஷாளுக்கு முன்னாடியா அங்கெல்லாம் போவாங்க? இதென்ன இது இப்படி இருக்கே! உங்க வீட்டிலே இதெல்லாம் சொல்லித் தரலையா” னு கேட்பாங்க. பிறந்ததில் இருந்து நல்ல கழிவறைகளையே பார்த்துட்டு இதெல்லாம் சொல்லித் தரலையானு கேட்டா என்ன பதில் சொல்றது! :))))இது நம்பர் ஒன், நம்பர் 2 இரண்டுக்கும் சேர்த்துத் தான். குளிக்கவும் குளியலறை, வெந்நீர் உள் எதுவும் இல்லை. கிணற்றடியிலேயே குளிக்கணும். கிணற்றடித் தாழ்வாரத்தில் தான் பெண்கள் எல்லாம் உட்கார்ந்து வம்பு பேசுதல், தயிர் கடைதல், அம்மியில், ஆட்டுக்கல்லில் அரைத்தல், காய் நறுக்குதல்னு எல்லாமும் நடக்கும். நாம குளிக்கிறதுக்காகவெல்லாம் யாரும் எழுந்து போக மாட்டாங்க. காக்காய்க் குளியல் தான் அவசரம் அவசரமா.

    இப்போவும் சில வருடங்கள் முன்வரையிலும் அங்கே போவதென்றாலே எனக்குக் கொஞ்சம் பயமாகத் தான் இருக்கும். திடீர்னு கழிவறை போகணும்னா என்ன செய்யறதுனு பயம்மா இருக்கும். பதினைந்து வருடங்கள் முன்னர் தான் எங்க சொந்தக்காரர் அந்த ஊர்க் கோயிலை எடுத்துத் திருப்பணி செய்கையில் கழிவறை, குளியலறை எல்லாமும் கட்டி வைத்திருக்கார். அதனால் கொஞ்சம் கவலையில்லாமல் போயிட்டு வருகிறேன்.

  2. வாங்க கீதா!

    ஐயோ! நீங்கள் என்ன நான் சொல்ல வந்ததையெல்லாம் சொல்லிடுவீங்க போலிருக்கே!
    நாங்கள் சிறுவர்களாக இருந்தபோது ஸ்ரீரங்கத்தில் எங்கள் வீட்டிலும் இப்படித்தான். ‘சந்து’ தான் எல்லாவற்றிற்கும்!
    ஆனால் வெகு சீக்கிரமே எங்கள் பெரிய மாமா இந்தியன் கழிவறை கட்டிவிட்டார்.
    சொல்லாதீங்க! சொல்லாதீங்க!

    வருகைக்கும் நீண்ட சுவாரஸ்யமான கருத்துரைக்கும் நன்றி!

    1. சின்ன வயசிலே எல்லாம் அப்படிக் கஷ்டப்படலை. கல்யாணம் ஆனப்புறமாத் தான்! ஒவ்வொரு முறை புக்ககம் போறச்சே எல்லாம் விபரீதத்துக்கு வயித்தைக் கலக்கும். எதுவும் சாப்பிடவே பயம்மா இருக்கும். நரகம் தான்! 🙂 ஆண்களுக்குக் கவலை ஏதும் இல்லை. பெண்களுக்குத் தான். அவங்க எல்லாம் பிறந்ததில் இருந்து இருந்ததால் பழகிட்டாங்க. நமக்குத் தான் எல்லாம் புதுசு! எப்போடா கிளம்புவோம்னு இருக்கும்!

      1. எப்படி சமாளிச்சீங்களோ! நான் ஒரு நாளைக்குள் திண்டாடிப் போய்விட்டேன். சின்ன வயதில் ஸ்ரீரங்கத்தில் இந்த dry லெட்ரீன் பார்த்திருக்கேன். அப்புறம் பல வருடங்களுக்குப் பின் அரியலூரில் பார்த்தேன். நாங்க அடுத்த நாளே கிளம்பிட்டோம்!

      2. // சின்ன வயதில் ஸ்ரீரங்கத்தில் இந்த dry லெட்ரீன் பார்த்திருக்கேன்//

        நீங்க வேறே ரஞ்சனி. அப்படி இருந்தாலும் பரவாயில்லையே. இது வெட்டவெளியில் போகணும். அல்லது மரத்தடியில் ஒதுங்கணும். கூரை ஆகாயம் தான். பக்கத்தில் உள்ள மரத்தடிகளில் எல்லாம் மத்தவங்க ஒதுங்கி இருப்பாங்க. அவங்க எல்லாம் சகஜமாப் பேசிண்டு இருப்பாங்க. எனக்குத் தான் கூச்சம் பிடுங்கித் தள்ளும். :)))))

  3. அவ்வளவு தூரம் நடந்து வந்தும் ஒரு தோசை போதுமா என்ன? மி.பொ சாம்பார் காம்பினேஷனும் தூக்கல்தான்.

    நான் கூட இது மாதிரி லேட்ரீன்களை பார்த்து டரியல் ஆகியிருக்கேன்! ஆண்களுக்கு அலர்ஜி இருக்காது என்று சொல்லாதீர்கள் கீதா மேடம்… பயங்கர அலர்ஜி. அந்த ஊருக்குப் போகவே பிடிக்காது!

    1. வாங்க ஸ்ரீராம்!
      அத்தனை தோசைகளை ஒரேயடியாகப் பார்த்ததில் ஆடிப் போய்விட்டேன். பசியே போய்விட்டது என்று சொல்லலாம்.
      அரியலூருக்கும் நாங்கள் ஒரு தடவை தான் போய்வந்தோம்.
      வருகைக்கும் கருத்துரைக்கும் நன்றி!

  4. இல்லே,இல்லே!!!!!!!!!ஒவ்வொரு கிராமத்துப் பழக்கம் ஒவ்வொரு மாதிரி இருக்கும்.
    மொத்தத்திலே சொல்லமுடியாத கஷ்டம்தான். தரைகிணத்துலே தண்ணி தூக்கணும்.
    எல்லாரும்அனுபவித்ததையும் ஒவ்வொருத்தரும் நினைத்துக்கொள்ள வேண்டியதுதான்.. தலைவாரிக்கொள்வதிலிருந்து, ஒவ்வொரு செயலும் விமரிசனத்துக்கு உள்ளாகும்.மொத்தத்தில் பணம் கட்டாத பரீக்ஷைதான்..

    சொல்லும்,செயலும்மாத்திரமில்லை. அக்னிப் பரீக்ஷைதான்.அன்புடன்

    1. வாங்கோ காமக்ஷிமா!
      அப்படியே நேரில் பார்த்தது போல சொல்லுகிறீர்களே! அதுவும் நான் மெட்ராஸ் பெண் என்று நிறையவே கவனிப்பிற்கு ஆளேனேன்!
      வருகைக்கும் கருத்துரைக்கும் நன்றி!

    1. வாங்க பாண்டியன்!
      ஸ்ரீரங்கத்தில் இந்த சருகு போட்டுத்தான் மதியம் சிற்றுண்டி கொடுப்பார் எங்க பாட்டி. அரியலூரில் கிட்டத்தட்ட ஸ்ரீரங்கம் வாழ்க்கையை மறுபடி வாழ்ந்தேன் என்றே சொல்லவேண்டும்.
      வருகைக்கும் கருத்துரைக்கும் நன்றி!

  5. கிராமனகழி எல்லாமே அழகு தான் . . இந்த லேற்றின் பிரச்சினை தன நம்மைப் பாடாய் படுத்தும். உங்களுடன் அரியலூர் பயணித்த அனுபவம் கிடைத்தது. உங்களுடன் அமர்ந்து தோசை சாப்பிடாதது தான் பாக்கி. சருகு தோசை , இந்தக் கிராம பசக்க வழக்கங்கள் எல்லாமே என் சிறு வயது விடுமுறை அனுபவங்களை நினைவில் கொண்டு நிறுத்துகின்றன. அடுக்குத் தோசையில் இரண்டே இரண்டு தான் சாப்பிட்டீர்களா?

    தொடருங்கள் …… நானும் உங்களைத் தொடர்கிறேன்.

    1. வாங்க ராஜி!
      நம் தலைமுறையில் எல்லோருக்கும் இந்த அனுபவங்கள் இருக்கும். அதற்கடுத்த தலைமுறைகளுக்கு இதெல்லாம் தெரியவே தெரியாது.
      அடுக்கு தோசையைப் பார்த்தவுடனே எனக்கு சாப்பிட்ட திருப்தி ஏற்பட்டுவிட்டது என்று நினைக்கிறேன்.
      வருகைக்கும் கருத்துரைக்கும் நன்றி!

  6. வணக்கம் அம்மா
    கனவில் வந்த காந்தி எனும் தொடர் பதிவில் கேட்கப்படும் பத்து கேள்விகளுக்கு விடையளிக்க தங்களை இன்முகத்தோடு அழைக்கிறேன் வாருங்கள் அம்மா
    http://pandianpandi.blogspot.com/2014/11/gandhi-in-dream.html

  7. மித்தமா என்று யோசித்து கொண்டே படிக்க பின் முற்றம் என்பதே சரி என்பதை அறிந்து பின் வெட்கமுற்றேன் நான் முத்தம் என்று என் சொல் அகராதியில் குறித்து வைத்திருந்ததை நினைத்து!

    1. வாங்க மஹா!
      ஹா…ஹா….. மித்தத்தை முத்தம் என்று நினைத்துவிட்டீர்களா?
      பேஷ்! பேஷ்! ரொம்ப நன்னாயிருக்கு!
      வருகைக்கும் கருத்துரைக்கும் நன்றி!

  8. ஒவ்வொரு வரியையும் ரசித்தேன்.

    அடுத்து தோசையில் ஒரு தோசையே போதுமென தோன்றிவிட்டதா? நல்லவேளை சித்தியும் விட்டாரே…..:)

    திருமணமானவுடன் என் கணவரின் பெரியம்மா வீட்டிற்கு முதல் முறை சென்ற போது சாப்பிட்டு முடித்தும் என் இலையில் ஆவக்காய் ஊறுகாய் அப்படியே இருந்தது. “ஏண்டி பிடிக்காதா? நான் நன்னா சமைக்கலையா? காரமா? நாளைக்கு நீயே சமைச்சு உங்காத்துக்காரருக்கு போடு? என்று வரிசையாக சொல்ல அப்படியே ஒரு துண்டு ஊறுகாயையும் வாயில் போட்டுக் கொண்ட அனுபவம் உண்டும்….:))

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s