முட்டாள்கள் தினம்

முட்டாள்கள் தினம்

வரும் ஞாயிற்றுக் கிழமை எல்லோருக்கும் மிகப் பிடித்தமான தினம்; நம்மை நாமே கொண்டாடிக் கொள்ளும் தினம். முட்டாள்கள், முட்டாள்களை முட்டாள்கள் ஆக்கி மகிழும் தினம். இப்போது புரிந்திருக்குமே? ‘All Fools Day’ என்று அழைக்கப்படும் ஏப்ரல் 1 ஆம் தேதியைப் பற்றித்தான் இந்தக் கட்டுரை.

எல்லோருமே ஜாலியாக சிரித்துக் கொண்டு ஒருவரையொருவர் சீண்டிகொண்டு நாம் முட்டாள்கள் தான் என்பதை ஒப்புக் கொள்ளவே இந்த தினம். இதை யாருமே தவறாக புரிந்து கொள்ளுவதோ  அல்லது அடுத்தவர் நம்மை முட்டாளாக்கியவுடன்  ‘விட்டேனா பார்’ என்று ஆத்திரமடைவதோ கூடாது.

அதேபோல முட்டாள் ஆக்க விரும்புவோர் அடுத்தவரது மனம் புண்படாமல் அதே சமயம் ‘ஓ! இந்தச் சின்ன விஷயத்தில் ஏமாந்து விட்டோமே என்று அவர் வாய்விட்டு சிரிக்கும்படியாக விளையாட வேண்டும். விளையாட்டு மட்டும்தான் குறிக்கோளாக இருக்கவேண்டும். எல்லை மீறாமல் இருந்தால் தொல்லைகள் இல்லை, அல்லவா?

சரி இந்த முட்டாள்கள் தினம் எப்படி வழக்கத்தில் வந்தது?

ஐரோப்பியர்கள் பல நூற்றாண்டுகளாக ஜூலியன் நாட்காட்டியைத்தான் பயன்படுத்தி வந்தனர். 18 ஆம் நூற்றாண்டின் நடுவில் கிரிகோரியன் நாட்காட்டி புழக்கத்தில் வந்தது. பழைய நாட்காட்டியின்படி ஏப்ரல் மாதத்தில்தான் புது வருடம்  ஆரம்பம். ஆனால் புதிய நாட்காட்டியில் ஜனவரியிலிருந்து புது வருடம் கணக்கிடப்பட்டது. இந்த மாற்றம் பல குழப்பங்களை உண்டு பண்ணியது. யாரெல்லாம் பழைய பஞ்சாங்கமாக இருந்தார்களோ அவர்கள் ‘முட்டாள்கள்’ என்று முத்திரை குத்தப் பட்டார்கள். காலப்போக்கில் இந்த தினம் மற்றவர்களை விளையாட்டாக, வேடிக்கையாக முட்டாள் ஆக்கும் தினமாக மாறி இன்றுவரை நிலைத்துவிட்டது.

இன்னொரு கதையும் வழக்கில் இருக்கிறது. ரோமானிய அரசன் கான்ஸ்டன்டைன் என்பவனது ஆட்சி பலத்த சர்ச்சைக்கு உள்ளானபோது, அவன் தனது அரசவை கோமாளி கூகல் என்பவனையும், தனது பழங்குடியினரையும் ஒரு நாள் நாட்டை ஆளச் சொன்னானாம். கோமாளிகள் உண்மையில் மிகுந்த புத்திசாலிகள்; வாக்கு சாமர்த்தியத்துடன் கூடிய வேடிக்கை பேச்சுக்கள் பேசுவதில் சமர்த்தர்கள். ஆனாலும் அவர்களை அந்தக் காலத்தில் முட்டாள்கள் என்று அழைப்பது வழக்கமாக இருந்தது. கோமாளிகள் ஆட்சி செய்த அந்த ஒருநாள் தான் All Fools Day. அப்போதிலிருந்து இந்த ஏப்ரல் ஒன்றாம் தேதி ‘முட்டாள்கள்’ தினமாக உலகெங்கிலும் மிகப் பெரிய உற்சாகத்துடன் கொண்டாடப்படுகிறது.

வரப் போகும் ‘முட்டாள்கள்’ தினத்தில் நாம் முட்டாள்கள் ஆனாலும் சரி, பிறரை முட்டாள்கள் ஆக்கினாலும் சரி, மனம் புண்படாமல் பண்பாக விளையாடுவோம்.

முட்டாள்கள் தின வாழ்த்துக்கள்!

 

 

 

 

published in ooooor.com 31.3.12

சமையல் குறள்கள்!

                    recipe-problems

சமையல் குறள்கள்!

கற்கக்கசடற சமையல் குறிப்புகளைக் கற்றபின்

சமைக்க அதற்குத் தக.

சமைத்துண்டு வாழ்வாரே வாழ்வார் மற்றெல்லாம்

தொழுதுண்டு பின் செல்பவர்.

உண்ட பொழுதின் பெரிதுவக்கும் தன சமையலை

சூப்பரெனக் கேட்ட அணங்கு.

மனையாளின் சமையலைப் புகழ்ந்து உண்டார்

நிலமிசை நீடு வாழ்வார்.

பாஸ்தா என்பர் நூடுல்ஸ் என்பர்

நீராகாரச் சோற்றின் அருமையரியாதார்.

சமைக்க சமைப்பின் சுவையாக அஃதில்லார்

சமைத்தலின் சமைக்காமை நன்று.

சுவையென்ப ஏனைய சத்தென்ப இவ்விரண்டும்

கண்ணென்ப உண்ணும் மாந்தர்க்கு.

நோய் வேண்டின் உண்ணுக ஹோட்டல்தனில்

நலம் வேண்டின் வீட்டுணவு.

சமைத்தலினும் நன்று அலங்கரித்தல் அதினிலும்

நன்றதனை டிஸ்பிளே செய்தல்.

சமைத்ததனால் ஆனபயன் என்கொல் ருசித்து

யாரும் அதனைப் புசியாரெனில்.

கற்பனைக்கும் உண்டோ அடைக்கும் தாழ் புதுவித

ரெசிப்பிகள் ஆவலுடன் படைப்போர்க்கு.

எக்குறை சொல்வோர்க்கும் உயுண்டாம் உய்வில்லை

சமையலை குறைசொல்லும் மகற்கு.

from an email sent by a friend

அலுவலகத்தில் நடக்கும் பாலியல் இன்னல்கள்

அலுவலகத்தில் நடக்கும் பாலியல் இன்னல்கள்

பக்கத்து வீட்டுப் பெண் கைப்பையும் கையுமாக கிளம்பும்போது ‘அவளுக்கென்ன கிளம்பிட்டா’ என்று நினைப்பவர்கள் நம்மில் பலர். ஆனால் ஒவ்வொரு நாளும் அலுவலகம் சென்று திரும்பும் அந்தப் பெண் அவள் பெண் என்ற காரணத்தால் சந்திக்கும் இன்னல்கள் பட்டியல் போட்டு மாளாது.

அலுவலகத்தில் ஜொள்ளு விடும் பாஸ், பக்கத்து இருக்கையில் அமர்ந்து அவளையே முறைக்கும் வழுக்கை விழுந்த நடு வயது தாண்டிய திருமணம் ஆன ‘வாலிபன்’, வயதாகிவிட்டது என்று சொல்லி அவளை  தொட்டுத்தொட்டு பேசும் ‘வயசாளிகள்’, பெண்களைப் பற்றிக் கேவலமாக பேசுபவர்கள், மறைமுகமாக கிண்டல் அடிப்பவர்கள் செவிகளைக்  கூசவைக்கும்  அசிங்கமான ஜோக் சொல்லுபவர்கள் என்று எத்தனை பேரை அந்தப் பெண் சமாளிக்க வேண்டும்? பாவம்!

அலுவலகத்தில் நடக்கும் இந்த பாலியல் இன்னல்களை சமாளிப்பது எப்படி?

அலுவலகம் செல்லும் பெண்களின் எண்ணிக்கை அதிகரித்துக் கொண்டே போகும் இந்நாளில் இந்தக் கேள்வி மிக இன்றியமையாதது.

1.       உங்களது விருப்பமின்மையை தைரியமாக வாய் விட்டுச் சொல்லுங்கள். உங்களுக்கு மிக அருகில் உங்கள் சக அலுவலர் வந்து நின்றால் “கொஞ்சம் தள்ளி நில்லுங்கள்; இத்தனை அருகில் நீங்கள் நிற்பது எனக்குப் பிடிக்கவில்லை” என்று பிறர் காதுகளில் விழும்படியாக சொல்லுங்கள். உங்களை தொட்டுப் பேசுபவர்கள், அசிங்கமான ஜோக்குகள் SMS அனுப்புபவர்கள் இவர்களுக்கும் அவர்களது எல்லைகோடு எது என்று தீர்மானமாக, தெளிவாகக் காட்டுங்கள்.

2.       அவருக்கு நீங்கள் சொல்லுவது புரியவில்லை போல நடித்தால், அவர் எப்போதெல்லாம் உங்களிடம் தவறாக நடக்க முயற்சித்தார் தேதி, நேரம் உட்பட எழுதி வைத்துக்கொள்ளவும். உங்கள் செல்போனில் அவர் பேசுவதை பதிவு செய்யுங்கள்.

3.       அதே அலுவலகத்தில் வேலை செய்யும் உங்கள் நெருங்கிய தோழியிடம் சொல்லுங்கள். அந்த நபரை உங்கள் தோழி கண்காணிக்கலாம். இல்லை என்றால் நம்பிக்கைக்குரிய, உங்கள் மேல் அக்கறை காட்டும் மேலதிகாரியிடம் நீங்கள் அந்தக் குறிப்பிட்ட நபரால் அனுபவிக்கும் இன்னல்களைச் சொல்லுங்கள். எச்சரிக்கை: நீங்கள் தேர்ந்து எடுக்கும் நபர் நிஜமாகவே உங்கள் நலனில் அக்கறை காட்டுபவராக இருக்கவேண்டும்.

4.       மேற்சொன்ன எதுவும் சரிப்படவில்லை என்றால், அவர் மேல் சாட்சியங்களுடன் உங்கள் மேலதிகாரியிடம் புகார்  எழுதிக் கொடுங்கள். வாயால் சொன்னால்

  • ‘அதெல்லாம் அப்படித்தான் இருக்கும். வெளியில் வந்துவிட்டால் இதையெல்லாம் சமாளிக்கத்தான் வேண்டும்.’
  • ‘இந்தச் சின்ன விஷயத்தை பெரிது படுத்தாமல் வாயை மூடிக்கொண்டு போ’
  • ‘வெளியே சொல்லாமல் இரு’  என்று உங்களை அடக்க நினைக்கலாம்.  அதனால் புகார் எழுதிக் கொடுத்து, அதன் நகலையும் பத்திரப் படுத்துங்கள்.

5.       நீங்கள் சாட்சியங்களுடன் எழுதிக் கொடுத்தும் உங்கள் அலுவலகத்தில் அந்த நபர் மேல் எந்த நடவடிக்கையும் எடுக்காத போது National Commission for Women, Human Right Law Network, Lawyers Collective போன்ற நிறுவனங்களின் உதவியை நாடலாம். அந்த நபர் மேல் நடவடிக்கை எடுக்கச்சொல்லி அவர்கள் மூலம் உங்கள் மேலதிகாரியை வற்புறுத்தலாம்.

6.       வேறு வேலை தேடலாம்: இந்த முடிவு கடைசி முடிவாக இருக்கட்டும்; புதிய அலுவலகத்தில் எல்லாமே நன்றாக இருக்கும் என்பது நிச்சயம் இல்லையே! புதிய வேலையைத் தேடிக் கொண்டு இந்த வேலையை விடுவது பற்றி தீர்மானம் செய்யுங்கள்.

சட்டம் என்ன சொல்லுகிறது?

2010 இல் அலுவலகத்தில் நடக்கும் பாலியல் துன்பங்களிலிருந்து பெண்களை பாதுகாக்கும் மசோதா முறைபடுத்தப்பட்டது.

  • இதன்படி ஒவ்வொரு அலுவலகத்திலும் பெண்களுக்கு பாதுகாப்பான சூழ்நிலையை ஏற்படுத்திக் கொடுப்பது முதலாளிகளின் கடமை. எந்தவிதமான பாலியல் இன்னல்களுக்கும் அவர்கள் ஆளாகாமல் வேலை செய்துவிட்டுப் போகும்படியான நிலை இருக்கவேண்டும்.
  • ஒவ்வொரு அலுவலகத்திலும் பெண்களை தலைவியாகக் கொண்ட பெண்கள் குழு ஏற்படுத்தப் பட வேண்டும். இக்குழு பெண்களுக்கு அலுவலகத்தில் ஏற்படும் பாலியல் துன்பங்களை விசாரிக்க வேண்டும்.
  • தேவையற்ற பாலியல் நடத்தை, பேச்சு மூலமாகவோ, உடல் ரீதியாகவோ பெண்களை இழிவு படுத்துவது, அவமானப் படுத்துவது, பொது இடங்களில் அசிங்கமான சித்திரங்கள் வரைவது, தரக் குறைவான SMS அனுப்புவது, பெண்களுக்கு விரோதமாக நடந்து கொள்ளுவது இவற்றை பாலியல் இன்னல்களாக இந்த மசோதா குறிப்பிடுகிறது.
  • வேலைக்குப் போகும் பெண்கள் மட்டுமில்லாமல், கல்லூரி மாணவிகள், பெண் ஆராய்ச்சியாளர்கள், மருத்துவ மனையில் இருக்கும் நோயாளிகள், வீட்டு வேலை செய்பவர்கள் என்று எல்லோரும் இந்த மசோதாவின் கீழ் கொண்டு வரப் பட்டுள்ளார்கள்.
  • ஒவ்வொரு அலுவலகத்திலும் பாலியல் இன்னல்கள் சட்ட விரோதமானவை அதில் ஈடுபடுபவர்கள் வேலை நீக்கம் செய்யப் படுவார்கள் என்று எழுத்தில் போட வேண்டும்.
  • பாலியல் இன்னல்களை செய்பவர் மீது உடனடி நடவடிக்கை எடுக்கவேண்டும்.

பெண்கள் தங்களை இவ்விதம் துன்புறுத்தும் கயவர்களைக் கண்டு பயப்படாமல் சட்டத்திடம் காட்டி கொடுக்க முன் வர வேண்டும்.

அப்போதுதான் இந்தக் கொடுமைக்கு ஒரு முடிவு கட்ட முடியும்

பாட்டியின் மரபணு!

பாட்டியின் மரபணு!

Elderly woman or old lady mowing the lawn and sweating in the hot sun clipart                                       Grandma and Grandchild Putting Flowers in Vase clipart                        Grandma - precious-and-sweet-grandma photo                                          Precious and Eternal - precious-and-sweet-grandma photo

ஒரு சோப் விளம்பரத்தில் பாட்டி சொல்லுவார்: “Like பாட்டி! Like பேத்தி!” அதாவது அழகு, அறிவு எல்லாவற்றிலும் பேத்தி தன்னைக் கொண்டிருக்கிறாள் என்று. இது வெறும் விளம்பரச் சொற்றொடர் அல்ல என்கிறார்கள் ஆராய்ச்சியாளர்கள். உண்மையிலேயே பாட்டிக்களுக்கும் பேரன் பேத்திகளுக்கும் மரபணு ரீதியாக மிகுந்த தொடர்பு இருக்கிறது கண்டு பிடிக்கப்பட்டு உள்ளது.

அதேபோல பல வீடுகளில் இளம் தாய்மார்களை விட பாட்டிமார்கள் மிகுந்த உற்சாகமாகவும், ஆரோக்கியமாகவும் இருப்பார்கள். இதற்குக் காரணம் பெண்களுக்கு இயற்கை தரும் மெனோபாஸ்!

மெனோபாஸ் ஏற்படுவதற்கு சரியான காரணம் இதுவரை தெரியவில்லை. தங்களது சந்ததிகளை நன்றாக போஷித்து ஆரோக்கியமான அடுத்த தலைமுறையை உருவாக்கவே இயற்கை பெண்களுக்கு மெனோபாஸ் என்ற ஒன்றைக் கொடுக்கிறது என்று ஒரு புனைவுக் கருத்து (hypothesis) நீண்டகாலமாக இருந்து வருகிறது.

நல்ல ஆரோக்கியமான  பாட்டிகள் புதிய தாய்மார்களுக்கு சின்னஞ்சிறு குழந்தைகளை வளர்ப்பதில் மிகச் சிறந்த உதவியாளர்களாக விளங்குகிறார்கள். மனிதக் குழந்தைகள் தங்களைத் தாங்களே தற்காத்துக் கொள்ள முடியாதது மட்டுமல்ல; நீண்ட காலத்திற்கு அம்மாவை சார்ந்தே இருக்கின்றன. மற்ற விலங்கினங்கள் போல் அல்லாமல் 3 வருடங்களுக்கு ஒரு முறை குழந்தை பிறக்கும் வாய்ப்பு மனித குலத்திற்கு இருப்பதும் பாட்டியின் தேவைக்கு ஒரு காரணம். புதிதாகப் பிறந்திருக்கும் குழந்தையை தாய் பார்த்துக்கொண்டால் முன்னால் பிறந்திருக்கும் குழந்தைகளை பார்த்துக் கொள்ள ஒரு பாட்டி வேண்டுமே!

மனிதவியல் வல்லுநர் திருமதி. க்ரிஸ்டன் ஹாக்ஸ் என்பவர் 1980 இல் தான்சானியாவில் உள்ள ஒரு வேட்டையாடும் பழங்குடியினர் இடையே  ஆராய்ச்சி நடத்தியதில், குழந்தைகளுக்கு நேரத்திற்கு உணவு கொடுத்து அவர்களை போஷித்துப் பாதுகாப்பது இந்த இனத்தில் இருக்கும் மூத்த பெண்மணிகள் என்று தெரிய வந்திருக்கிறது.

இந்த ஆய்வுக்கு பிறகு பின்லாந்து நாட்டில் 2004 இல் ஒரு ஆய்வறிக்கை வெளியிடப்பட்டது. இந்த ஆய்வறிக்கை மெனோபாஸ் முடிந்து நீண்டகாலம் வாழும் பாட்டிமார்களுக்கு நிறைய பேரக் குழந்தைகள் இருப்பதை சுட்டிக் காட்டியது. பாட்டியின் சீராட்டலால் பேரக் குழந்தைகள் நீண்ட காலம் ஆரோக்கியமாக வாழவும் செய்தார்களாம்.

தங்களை வளர்த்து ஆளாக்கும் பாட்டிகளிடம் பேரன் பேத்திகள் அலாதியான அன்பும், பாசமும் காட்ட வேறு ஒரு காரணமும் உண்டு. அது அவர்கள் பகிர்ந்துகொள்ளும் மரபணுத் தொடர்பு!

எல்லாப் பெண்களுக்கும் இரண்டு X குரோமோசோம்கள் உண்டு. ஆணுக்கு ஒரு X குரோமோசோம் ஒரு Y குரோமோசோம் இருக்கின்றன. ஒரு ஆண்மகன் தன் தாயிடமிருந்து கிடைக்கும் ஒரே ஒரு X குரோமோசோமை தன் மகளுக்குக் கொடுக்கிறான்.

இதனால் தந்தை வழிப் பாட்டி தனது பேத்திகளுடன் 50% X குரோமோசோம் தொடர்புடையவள் ஆக இருக்கிறாள். ஆனால் தன் பேரன்களுடன் (பெண்களுக்கு Y  குரோமோசோம் இல்லாததால்) எந்தவித குரோமோசோம் தொடர்பும் அற்றவளாக இருக்கிறாள். தாய்வழிப் பாட்டி தன் பேரன் பேத்திகளுடன் ஒரே சீராக 25% X குரோமோசோம் தொடர்புடையவள் ஆக இருக்கிறாள். மரபணுத் தொடர்பு பாட்டிகளுக்கும் பேரன் பேத்திகளுக்கும் 23% லிருந்து 31% வரை இருக்கிறது. ஏன் X குரோமோசோம்? நமது மரபணுக்களில் 8% இந்த X குரோமோசோம்களால் ஆனது. குழந்தைப் பேறும் இதில் அடக்கம்.

மிகவும் சுவாரஸ்யமான இந்த அறிக்கை Proceedings of the Royal Society, Series B, Biological Sciences இல் வெளியானபோது மிகப் பெரிய அளவில் பதிவிறக்கம் செய்யப்பட்ட 10 கட்டுரைகளில் ஒன்றாக இருந்தது.

ஆனால் ஒரு கேள்வி மனதை நெருடுகிறது. வெறும் மரபணுவை வைத்து மட்டுமே பாட்டிகள் தங்கள் பேரன் பேத்திகளை எவ்வளவு நேசிக்கிறார்கள் என்று கணக்கிட முடியுமா?

குரோமோசோம்கள் தவிர, குழந்தைகள் வாழும் சூழ்நிலை, அவர்களது கலாச்சாரம் இவையும் கூட உறவுகளை தீர்மானிக்கும் சக்திகளாக இருக்கின்றன என்பதுதான் நிஜம்.

ஜப்பான் நாட்டில் டோக்கியோவில் இருக்கும் வாசேடா பல்கலைக் கழகப் புரொபசர் திரு. யாசுயுகி ஃபுகுகவா (Yasuyuki Fukuoka) 3,168 பெண்களை ஆராய்ந்து வெளியிட்ட அறிக்கை, தந்தை வழிப் பாட்டியின் செல்வாக்குத்தான் குழந்தைகளின் வாழ்வில் மிகப் பெரிய பங்கு வகிக்கிறது; மகன்களுக்கு விரைவில் முதல் குழந்தை பிறப்பதற்கும், முதல் குழந்தைக்கும் இரண்டாவது குழந்தைக்கும் இடையில் அதிக இடைவெளி இல்லாமல் இருப்பதற்கும் தாய் வழிப் பாட்டி தான் காரணம் என்கிறது.

இதற்கு இவர் சொல்லும் காரணம்: ஜப்பான் நாட்டில் மருமகள் திருமணத்திற்கு பிறகு மாமியார் வீட்டில் வந்து  வசிப்பதுதான்!

 

 

published in ooooor.com

cartoons courtesy:  clip art  and so sweet grandma

சூப்பர் டூப்பர் ‘நடாஷா’

விலங்கினங்களிலிருந்து மனிதனைப் பிரித்துக் காண்பிப்பது அவனது ஆறறிவு தான். ஆனால் 22 வயது நடாஷா என்கிற பெண் மனிதக் குரங்கு, ஆராய்ச்சியாளர்களை தனது புத்திக் கூர்மையினால் இந்தக் கூற்று சரியா என்று பலமாகச் சிந்திக்க வைத்திருக்கிறது.

சூழ்நிலைக்குத் தக்க தன்னை மாற்றிக் கொள்ளுவதிலும், தனது சக மனித குரங்குகளுடன் பழகும் விதத்திலும் வேறு பட்டு தனித்தன்மையுடன் இருக்கிறாள் நடாஷா. தனக்கு உணவு கொடுக்க வரும் பொறுப்பாளரின் கவனத்தை கையைத் தட்டி, ஈர்த்து அதிக உணவைப் பெற்றுக் கொள்ளுகிறாள். அதுமட்டுமல்ல. தன்னை காண வரும் பார்வையாளர்களிடையே இவள் செய்யும் கோமாளித்தனமான விளையாட்டுக்கள் மிகப் பிரபலம். தன்னை பார்க்க வரும் பார்வையாளர்களை அருகே வரும்படிக் கூப்பிட்டு அவர்கள் தன்னை நெருங்கும் போது அவர்கள் மீது தண்ணீர் பீச்சி அடிப்பது இவளுக்குப் பிடித்தமான விளையாட்டு!

ஜெர்மனியைச் சேர்ந்த விஞ்ஞானிகள் இவளை ஆராய்ந்ததில் சில மனிதக் குரங்குகள் சமூக சூழ்நிலைகளை உள்ளுணர்வால் மற்ற விலங்கினங்களை விட மிகச் சிறந்த முறையில் அறிந்து கொள்ளுகின்றன என்பது தெரிய வந்திருக்கிறது. நடாஷா மனோரீதியான பரிசோதனைகளில் 100 க்கு 200 மதிப்பெண் வாங்கி இருக்கிறாள்!

கிட்டத்தட்ட மனிதனின் புத்திக் கூர்மையுடன் சூப்பர் டூப்பர் நடாஷவைப் பார்த்த, ஆராய்ந்த விஞ்ஞானிகள் கற்பனைக் கதைகளில் வரும் ‘சூப்பர் குரங்குகள்’ எதிர்காலத்தில் நிஜமாக உருவாகும் சாத்தியக் கூறுகள் அதிகம் என்று கூறுகிறார்கள்.

 published in ooooor.com

பருப்புசிலி ஜீன்!

 

பருப்புசிலி ஜீன்!

“பரசாரா! மணி பதினொண்ணு ஆகப் போறது! சாப்பிட வாயேன்!” – ரங்கநாயகி குரல் கொடுத்தாள்.

தனது பர்சனல் கம்ப்யூட்டரில் ஜீனோம் வரிசையைப் பார்த்துக் கொண்டிருந்த பராசரன் அம்மாவின் குரல் கேட்டு கவனம் கலைந்து எழுந்தார்.

“ஏம்மா! நீ சாப்பிட்டாயோ? எனக்காகக் காத்துக்கிட்டு இருக்காதேன்னு எத்தனை தடவை சொன்னாலும் கேட்க மாட்டியே!” என்றபடியே தனது அறையை விட்டு வெளியே வந்தார் பராசரன்.

“உனக்கு என் கையால சாப்பாடு போட்டாத்தான் எனக்கு திருப்தி!” என்று சொல்லியபடியே ரங்கநாயகி டைனிங் டேபிளின் மேல் அவரது வெள்ளித் தட்டை எடுத்து வைத்தாள்.

“ஏம்மா! இன்னிக்கு என்ன சமையல்?” என்று கேட்டபடியே பராசரன் வந்து உட்கார்ந்தார்

“இன்னிக்கு ஞாயிற்றுக்கிழமை! வழக்கம்போல் கொத்தவரங்காய் பருப்புசிலியும் ரசமும் தான்!” என்று பதில் சொல்லியவாறே அவருக்குப் பரிமாற ஆரம்பித்தாள் அவர் அம்மா.

பராசரன் வெகு ஆவலுடன் அம்மா பண்ணியிருந்த கொத்தவரங்காய் பருப்புசிலியை சாதத்தில் பிசைந்து சாப்பிட ஆரம்பித்தார். அம்மா கைச்சமையல் என்றாலே தனி ருசிதான். இத்தனை வருடங்களாக துளிக் கூட ருசி மாறாமல் அம்மாவால் எப்படிப் பருப்புசிலி பண்ண முடிகிறது? வழக்கம்போல் மனதிற்குள் வியந்து கொண்டே சாப்பிட்டார் பராசரன்.

மிகவும் ஆசையுடன் தான் செய்திருந்த பருப்புசிலியை சாப்பிடும் பிள்ளையை ‘எத்தனைதான் பெரிய விஞ்ஞானியா இருந்தாலும், அம்மாவிற்குப் பிள்ளைதானே!’ என்ற எண்ணத்துடன் நெகிழ்ச்சியாகப் பார்த்துக் கொண்டே, புதிய விருந்தாளியை உபசரிப்பதுபோல கேட்டுக் கேட்டு பரிமாறினாள்.

பராசரன் பிறந்தது வளர்ந்தது, பள்ளிப் படிப்பை முடித்தது எல்லாம் ஸ்ரீரங்கத்தில். கல்லூரிப் படிப்பிற்காகதான் ஸ்ரீரங்கத்தை விட்டு வெளியே வந்தார் அவர். மெட்ராசிலும், பிறகு வெளிநாட்டிலும் மேல் படிப்பை முடித்தார். பயோடெக்னாலஜியில் அவருக்கு இருந்த அளவற்ற ஈடுபாடு காரணமாக அதிலேயே ஆராய்ச்சியை மேற்கொண்டார். சென்னை பயோடெக்னாலஜி சென்டரில் தலைமை விஞ்ஞானியாகப் பல வருடங்கள் பணியாற்றி, அந்த மையத்தின் டைரக்டராகவும் பதவி வகித்து சமீபத்தில்தான் ஓய்வு பெற்றிருந்தார். பதவிக் காலத்தில் உலகம் முழுவதும் சுற்றி வந்தவர்.

அவரது மனைவி வேதம் இரண்டு குழந்தைகளைப் பெற்றுப் போட்டு விட்டு ‘பூவும் பொட்டு’மாகப் போய் சேர்ந்து விட்டாள். அவரது மகன் முகுந்த் பராசரன் அமெரிக்காவில் இருந்தான். அப்பாவைப் போலவே அவனும் உயிரியலில் ஆராய்ச்சி செய்து கொண்டிருந்தான். அமெரிக்கப் பெண்ணை மணந்து அங்கேயே செட்டில் ஆகிவிட்டான். அவனுக்கு ஒரு பெண் ‘ஜோ’ என்கிற ஜ்யோத்ஸ்னா. பராசரனின் மகள் ஜெயஸ்ரீ தன் கணவன் டிமோன் ஜபர்சனுடன் ஜெனீவாவில் இருந்தாள். மகள், மாப்பிள்ளை இருவருமே ஜெனடிக் என்ஜினீயரிங் படித்தவர்கள். ஜெயந்த் ஜெபர்சன் என்ற ஒரு பிள்ளை.

பராசரன் தனது ஓய்வுக்குப் பிறகு மீண்டும் ஸ்ரீரங்கத்திற்கே வந்து விட்டார். தன் தகப்பனாரின் பூர்வீக வீட்டில் தாயார் ரங்கநாயகியுடன் வசித்து வந்தார். வீட்டிலேயே பி.சி. ஒன்றை வாங்கிப் போட்டுக் கொண்டு வலைய இணையம் மூலமாக உலகத்தை பார்த்துக் கொண்டிருந்தார். பிள்ளையுடனும் பெண்ணுடனும் பேரன் பேத்திகளுடன் தினமும் ‘சாட்’ செய்வதும், தன் அம்மாவிற்காக அவர்களுக்கு ஈமெயில் அனுப்புவதும் அவருக்குப் பிடித்தமான பொழுதுபோக்கு.

திருப்தியாகச் சாப்பிட்டு முடித்த பராசரன் தனது அறைக்கு வந்து மறுபடியும் ‘ஜீனோமை’ பார்க்க ஆரம்பித்தார். மாலை நான்கு மணிக்கு வழக்கம்போல ரங்கநாயகி சுடச்சுடக் காபியை எடுத்துக் கொண்டு பிள்ளையின் அறைக்கு வந்தாள். அவர் பி.ஸி யில் ஏதோ ஆர்வமாகப் பார்த்துக் கொண்டிருப்பதைக் கண்டு, “ஏண்டாப்பா!, கொஞ்ச நேரம் படுத்துக்கறதுதானே?” என்று பரிவுடன் கேட்டபடியே காப்பியை நீட்டினாள்.

“பயோடெக்னாலஜில ரொம்பப் பெரிய விஷயத்தைக் கண்டுபிடிச்சிருக்காம்மா. அதைக் கம்ப்யூட்டரல பார்த்துக்கொண்டே இருந்தேன். தூக்கமே வரலை!” என்று அம்மாவிற்கு பதில் சொல்லிவிட்டு காப்பியை சுவைக்க ஆரம்பித்தார்.

“அப்படி என்ன கண்டுபிடிச்சிருக்கா?” – ரங்கநாயகி கேட்டாள். அவளுக்கு எப்போதுமே புதிய விஷயங்களைக் கற்றுக் கொள்ள ஆர்வம் அதிகம்.

“இவ்வளவு நாளா பெரிய புதிரா இருந்த ஜீன்களைப் பத்தின மர்மத்தைத் தான் விஞ்ஞானிகள் விடுவிச்சிருக்கா!” என்று குரலில் அதீத உற்சாகத்துடன் சொல்லிக் கொண்டே போனார் பராசரன். “இதனால இன்ன குணத்திற்கு இன்ன ஜீன் காரணம்னு தெரிஞ்சுடும். பரம்பரை நோய்கள் அடுத்த தலைமுறைக்கு வராம தடுத்துடலாம். எல்லாத்துக்கும் மேலா மனுஷா சிரஞ்சீவியா வாழலாம்…..!”

“அப்படியா…?” என்று அவர சொல்வதை உன்னிப்பாகக் கேட்டுக் கொண்ட ரங்கநாயகி, ”ஏதாவது மெயில் இருக்கா, பாரேன்!” என்றாள்.

இப்போதெல்லாம் தனக்கு யாரும் கடிதமே எழுதுவதில்லை என்று அவளுக்கு கொஞ்சம் வருத்தம்தான். விஷயப் பரிமாற்றங்கள் எல்லாம் உடனுக்குடன் ஈமெயில் மூலம் நடந்து விடுகிறது. ஆனாலும் கடிதம் வந்தால் திரும்பத் திரும்ப படிக்கலாம். தானும் தன் கைப்பட எழுதலாம் என்று நினைத்துக் கொள்வாள். பதினைந்து நாட்களுக்கு ஒரு முறை பேரன் பேத்திகளிடம் இருந்து வரும் ஈமெயிலை பராசரனுடன் உட்கார்ந்து பார்ப்பாள்.

“இதோ பார்க்கிறேன் அம்மா!” என்றபடியே தன் மெயில் பாக்ஸை திறந்தார். இரண்டு புதிய மெயில்கள் இருந்தன.

முதலாவது அவரது மகள் வயிற்றுப் பேரன் ஜெயந்த் ஜெபர்சன் அனுப்பி இருந்தான். வழக்கமான விசாரிப்புக்களுக்கு பிறகு அவன் தனது கொள்ளுப் பாட்டியை மிகவும் நினைவு படுத்திக்கொண்டு, “அம்மா போன ஞாயிற்றுக்கிழமை பருப்புசிலி செய்திருந்தாள். வாட் அ டேஸ்ட்! எனக்கு ரொம்பப் பிடிச்சு போச்சு! கொள்ளுப் பாட்டி இன்னும் ரொம்ப நன்றாக செய்வாள் என்று அம்மா சொன்னாள். நான் இந்தியாவிற்கு வரும்போது கொள்ளுப் பாட்டி கையால் பருப்புசிலி சாப்பிட மிக ஆவலாக இருக்கிறேன்! இனிமேல் ஒவ்வொரு ஞாயிற்றுக்கிழமையும் பருப்புசிலி பண்ணச் சொல்லி விட்டேன்” என்று எழுதியிருந்தான்.

ரங்கநாயகிக்கு மகிழ்ச்சி தாங்க முடியவில்லை. “ஜெயஸ்ரீ ரொம்ப சமத்து! நம்ம உணவுப் பழக்கத்தை மறக்காமல் குழந்தைக்கு பருப்புசிலி பண்ணிப் போடறா பாரு!” என்று சொல்லிச்சொல்லி மாய்ந்து போனாள். பராசரனுக்கும் பேரன் பருப்புசிலி சாப்பிட்டது சந்தோஷமாகத்தான் இருந்தது.

இரண்டாவது மெயிலை பராசரனின் மகன் முகுந்த் அமெரிக்காவிலிருந்து அனுப்பியிருந்தான். தனது ஆராய்ச்சி பற்றி அப்பாவுக்கு தெரிவித்து விட்டு கடைசி நாலு வரி தன் பாட்டிக்கு எழுதியிருந்தான்.

“அன்புள்ள பாட்டி! சென்ற ஞாயிற்றுக்கிழமை நானே பருப்புசிலி பண்ணியிருந்தேன். நான் முதல்முறையாக அமெரிக்கா போனபோது நீதான் எனக்கு பருப்புசிலி எப்படிப் பண்ணுவது என்று எழுதிக் கொடுத்தாய். என் அருமைப் பாட்டி! உன் கை மணம் எனக்கு வரவில்லை. ஆனால் உன் நினைவு ஏகமாக வந்தது. என் பெண் ஜ்யோத்ஸ்னாவிற்கு நான் செய்திருந்த பருப்புசிலி ரொம்பப் பிடித்து விட்டது. அங்கே நம்ம வீட்டில ஞாயிற்றுக்கிழமை மெனு பருப்புசிலிதான் என்று சொன்னவுடன், ‘நீயும் அப்படியே பண்ணுப்பா!” என்கிறாள். உன் கையால் பருப்புசிலி சாப்பிடணும் போலிருக்கு! அதற்காகவே கூடிய சீக்கிரம் இந்தியா வர நினைக்கிறேன்!”

“நல்லக் கூத்து போ! உங்க தாத்தாவுக்கு பருப்புசிலி ரொம்பப் பிடிக்கும். உங்க அப்பா, அவருக்குப் பிறகு நீ, உன் குழந்தைகள், இப்போ உன் பேரன் பேத்திக்கும் பருப்புசிலி பிடிச்சுடுத்தே! நீ கொஞ்ச நேரம் முன்னால பரம்பரைக் குணம் ஜீன் என்றல்லாம் சொல்லிண்டு இருந்தாயே! நம்ம வீட்ல பருப்புசிலி ஜீன் பரம்பரை எல்லோருக்கும் வந்திருக்குப் போல இருக்கு!” என்று சொல்லி விட்டு வாய் விட்டுச் சிரித்தாள் ரங்கநாயகி.

ஒரு நிமிடம் தன் தாயாரை வியப்பு மேலிடப் பார்த்த பராசரன், “ஆமாம்மா! பருப்புசிலி ஜீன்தான்!” என்று சொல்லிவிட்டு அம்மாவுடன் சிரிப்பில் கலந்து கொண்டார்.

published in Mangayar malar

 

 

உங்கள் வீட்டில் அட்லஸ் இருக்கிறதா?

 

 

 

 

 

 

உங்கள் வீட்டில் அட்லஸ் இருக்கிறதா? இல்லையென்றால் உடனே உடனே ஒன்று வாங்கி எல்லோருக்கும் கண்ணில்படும் படியாக மாட்டுங்கள். காரணம் சொல்லுகிறேன். உலக வரைபடத்தைப் பார்ப்பது மிக அருமையான பொழுது போக்கு. உங்கள் குழந்தைக்கு உலக வரைபடத்தைக் காட்டி நிறைய சொல்லிக் கொடுக்கலாம். Map reading என்பது எல்லா வயதினருக்கும் ஒரு சுவாரஸ்யமான ஒரு விஷயமாக இருக்கும்..

பல சமயம் எனக்கு இந்த மேப் ரீடிங் பல விஷயங்களை அறிய உதவி இருக்கிறது.

என் அக்கா பிள்ளைக்கு பெண் குழந்தை பிறந்திருந்தது. குழந்தைக்கு 5 வயதில் ஸ்ரேயா என்று ஒரு அக்கா.

“தங்கச்சிப் பாப்பா பெயர் என்ன?” என்றேன் அவளிடம்.

அவள் “மேக்னா” என்றாள்.

எனக்கு எப்போதுமே ஒரு பழக்கம். எந்தப் பெயரைக் கேட்டாலும் என்ன அர்த்தம் என்று கேட்பேன். இப்போதும் அதேபோலக் கேட்டேன்.

“ஒரு நதியின் பெயர்” என்றாள் ஸ்ரேயா.

நான் சிரித்துக் கொண்டே “எந்த நாட்டில்…..?” என்றேன்.

ஸ்ரேயா உடனே என்னை அழைத்துப் போய் அவர்கள் வீட்டில் மாட்டியிருந்த உலக வரைபடத்தைக் காண்பித்து “இதோ பாரு சித்தி, வங்க தேசத்தில் ஓடும் ஒரு நதியின் பெயர் மேக்னா” என்றாள். நான் அசந்து போனேன்.

வங்க தேசத்தில் ஓடும் ஒரு முக்கியமான நதி மேக்னா. பிரம்மபுத்ரா நதியிலிருந்து பிரியும் இந்த நதி கங்கையுடன் சேர்ந்து கங்கை படுகையை ஏற்படுத்திவிட்டு வங்காள விரிகுடாவில் கலக்கிறது. மேக்னா நதியைப் பற்றி இத்தனை செய்திகளையும் (இன்னும் நிறைய செய்திகளையும்) அந்தக் குழந்தை சொன்ன ஒரு செய்தியிலிருந்து தெரிந்து கொண்டேன்.

இதைப் போல இன்னொரு அனுபவம். ஒரு முறை குடும்பத்துடன் கர்நாடகாவிலுள்ள கெம்மணங்குடி என்ற மலைபிரதேசத்துக்குப் போயிருந்தோம். 4 நாட்கள் தங்கலாம் என்று போனவர்கள் ஒரே நாளில் கீழே இறங்கிவிட்டோம். வேறு எங்கு போவது? மெதுவாக காரை ஓட்டிக் கொண்டு வந்தார் என் கணவர். வழியில் ஒரு பேருந்து நிலையம். வண்டியை நிறுத்தி உள்ளே விசாரிக்கப் போனோம். அங்கு ஒரு வரைபடம். அதைப் பார்த்தவுடன் எனக்கு ஏற்பட்ட சந்தோஷத்தை சொல்ல வார்த்தைகளே இல்லை.

பெங்களூர் வந்ததிலிருந்து எனக்கு உடுப்பி போய் கிருஷ்ணனைசேவிக்க வேண்டும் என்று தீராத ஆசை. நாங்கள் அப்போது நின்று கொண்டிருந்த இடத்திலிருந்து உடுப்பி 100 கி.மி. தூரத்தில் இருப்பது அந்த வரைபடத்திலிருந்து தெரிய வந்தது.

எந்த மாநிலத்துக்குப் போனாலும் அதன் வரைபடத்தை வாங்கிவிடுவேன். என் கணவர் கார்  ஓட்டும்போது முன் சீட்டில் உட்கார்ந்து கொண்டு வழி காட்டுவது எனக்கு மிகப் பிடித்தமான ஒன்று.

சின்ன வயதில் உலக வரைபடத்தை பார்க்கும் போது உலகம் உருண்டை என்கிறார்களே, ஆனால் எல்லா நாடுகளும் ஒரே நேர்கோட்டில் இருக்கின்றனவே என்று தீராத சந்தேகம். தையரியத்தை வரவழைத்துக் கொண்டு லீலாவதி டீச்சரை கேட்டே விட்டேன். அவர் உடனே “மக்கு! மக்கு! உலக உருண்டையை பார்த்ததில்லையா? ஆபீஸ் ரூமிலிருந்து கொண்டு வா!” என்று சொல்லி ஒவ்வொரு நாடும் எங்கெங்கு இருக்கிறது என்று விளக்கினார். பிறகு உலக வரைபடத்தை க்ளோப் வடிவில் மடித்து “இப்போது பார், உலகம் உருண்டையாக இருக்கிறதா?” என்றார். எனது மேப் ரீடிங் ஆசைக்கு லீலாவதி டீச்சரும் ஒரு காரணம்.

வேர்ட்பிரஸ் வலைப்பதிவு செய்ய ஆரம்பித்ததிலிருந்து உலக வரை படத்தின் மேல் எனக்கு ஒரு தனி மதிப்பு! ஏன் தெரியுமா? தினமும் எனது எழுத்துக்களை எத்தனை பேர் எந்தெந்த நாட்டிலிருந்து படிக்கிறார்கள் என்ற புள்ளி விவரம் வருகிறதே!

கோடை விடுமுறை ஆரம்பித்து விட்டது. குழந்தைகளுக்கு பொழுது போவது மிகவும் கஷ்டம். அவர்களுக்கு இந்த மேப் ரீடிங் பற்றி சொல்லிக் கொடுங்கள். அவர்களை அருகில் உட்கார்த்திக் கொண்டு நீங்கள் பிறந்த ஊர்,

வளர்ந்த ஊர், நீங்கள் இதுவரை பார்த்த இடங்கள் என்று காண்பியுங்கள். ஒவ்வொரு இடத்தின் விசேஷங்கள், சுற்றுலா இடங்கள் என்று சொல்லிக் கொண்டே போகலாம். நாடுகளின் தலை நகரம், பேசும் மொழி, அங்கு ஓடும் நதிகள், சுற்றி இருக்கும் கடல்கள் என்று எத்தனை எத்தனையோ விஷயங்களை சொல்லிக் கொடுக்கலாம்.

வீட்டில் ஒரு உலக வரைபடம் இருந்தால் போதும் நாம் இப்போது இருக்கும் இடத்திலிருந்து ஆரம்பித்து உலகையே ஒரு சுற்று சுற்றி வரலாம் – உட்கார்ந்த இடத்திலிருந்தே பைசா செலவில்லாமல்!

Joke courtesy: Cartoonstock                                       

வேலை

வேலை

 

 

“மத்தியான சாப்பாடு டேபிள் மேல இருக்கு. காபி பிளாஸ்க்ல இருக்கு!” – கணவனிடம் சொல்லிவிட்டு தலை வார ஆரம்பித்தாள். அவளது செயல்களை கண் கொட்டாமல் பார்த்துக் கொண்டிருந்த சாரதி ‘சரி’ என்றார்.

சித்ரா தலைவாரி முகம் கழுவி லேசான மேக்கப்புடன் வந்தாள். அவருக்கும் டிபன் எடுத்து வந்து வைத்து விட்டு சாப்பிட ஆரம்பித்தாள். ஐந்தே நிமிடத்தில் சாப்பிட்டு முடித்து புடவை மாற்றிக் கொண்டாள். டிபன் பாக்ஸை கைப்பையில் வைத்தபடி ‘போயிட்டு வரேன்’ என்று ஆபீஸுக்கு கிளம்பிப் போனாள்.

அவர் ஓய்வு பெறுவதற்கு முன்பும் இதே ரொட்டின் தான். அப்போது அவரும் கிளம்ப வேண்டியிருந்ததால் அவளை, அவள் வேலையைக் கவனிக்க முடிந்ததில்லை. தான் வீட்டில் இருக்க, அவள் மட்டும் வேலைகளை முடித்து விட்டு ஆபிஸ் போவதால் அவரது முழுகவனமும் அவள் மேல் விழுந்தது.

இருவரும் அரசு வேலையில் இருந்தனர். சித்ரா அவரைவிட பத்து வயது இளையவள். சாரதி அண்டர் செகரட்டரியாக பணியாற்றி ஓய்வு பெற்றவர்.

முதல் ஒரு வாரம் போனதே தெரியவில்லை. இன்று திங்கள். ஆபீஸ் செல்லும் அவரசம் இல்லாததால் நிதானமாக காபி குடித்துக் கொண்டே பேப்பர் படித்தாயிற்று. போரடித்தது. ஒரே வாரத்தில் இப்படி போரடிக்கிறதே! சித்ரா ஒய்வு பெறும்வரை இப்படித்தான் தனிமையில் இருக்க வேண்டுமோ? பத்து வருடம்! லேசான பயம் எழுந்தது.

தூங்கி எழுந்து மணி பார்த்தார். 4 ஆகியிருந்தது. டீ.வீ. போட்டார். பிளாஸ்கில் இருந்த காபியை குடித்தார். சித்ரா செய்து வைத்திருந்த நாடா பக்கோடாவை சாப்பிட ஆரம்பித்தார். டீ.வீ. பார்த்துகொண்டே காலி செய்துவிட்டார். அடடா! சித்துவுக்கு ஒன்றுமே இல்லையே! என்ன செய்வது?

அய்யங்கார் பேக்கரிக்குப் போய் ப்ரெட் வாங்கி வந்தார். சித்ராவுக்கு  பிரெட்  ஜாம் பிடிக்கும். ஃபிரிட்ஜை திறந்து பார்த்தார். ஜாம் இருந்தது. பக்கத்தில் அமுல் பட்டரும் இருந்தது. சட்டென்று ஒரு யோசனை. ப்ரெட் சாண்ட்விச் செய்தாலென்ன? பரபரவென செயல்பட்டார். சாண்ட்விச் மேக்கரை எடுத்து உயிரூட்டினார். ஒரு பிரட்டில் ஜாம் தடவினார். இன்னொன்றில் வெண்ணை தடவினார். எல்லா ஸ்லைஸ்களையும் சாண்ட்விச் மேக்கரில் வைத்து எடுத்தார். மொறுமொறுவென சாண்ட்விச் பார்க்க அழகாக இருந்தது. காசரோலில் போட்டு மூடினார். மணி பார்த்தார். பத்து நிமிடத்தில் சித்ரா வந்து விடுவாள். காபியும் போட்டு விடலாம்! ஃப்ரிட்ஜில் இருந்த பால் பாக்கெட்டை எடுத்து வெட்டி பாத்திரத்தில் கொட்டி அடுப்பில் வைத்தார். இன்னொரு பர்னரில் ஒரு பாத்திரத்தில் தண்ணீர் வைத்தார். டிகாஷன் சொம்பை அதற்குள் வைத்தார்.

 

‘டிங் டாங்…….. டிங் டாங்……..’ காலிங் பெல் ஒலித்தது. சித்ராதான். சாரதி கதவு திறந்து, “ஹாய் சித்து!” என்று உற்சாகமாக வரவேற்றார். உற்சாகத்தின் காரணம் புரியாமல் சித்ராவும் ‘ஹாய்’ சொல்லிவிட்டு, “சாதம் சாப்டீங்களா? காபி, பக்கோடால்லாம் சாப்டீங்களா?” என்று அடுக்கடுக்காக கேள்வி கேட்டாள்.

“ஊம்……எல்லாம் ஆச்சு! உனக்குகூட டிபன் ரெடி” என்றார் சாரதி.

“எனக்கா?” வியப்புடன் கேட்டாள் சித்ரா.

“ஆமா! நீ போய் மூஞ்சி கைகால் அலம்பிட்டு வா. டிபனும் காபியும் கொண்டு வரேன்” என்று சொல்லிவிட்டு சமையலறைக்குள் சென்றார் சாரதி.

வாஷ் பேசினில் முகம் கழுவிக் கொண்டே சித்ரா. “ப்ளம்பர் வந்தானா?” என்றாள்.

“ஆமா! போய் கூட்டிட்டு வந்தேன்.”

“ரொம்ப தேங்க்ஸ்”

“வெல்கம்”

முகத்தை டவலால் துடைத்தபடி வந்தவள் “டிபன் வாங்கிட்டு வந்தீங்களா?” என்று கேட்டாள்.

“வெளிலேருந்தா? மூச்! நானே பண்ணினேன். நீ டைனிங் டேபிளுக்கு வா” என்று சொல்லியபடி ஒரு கையில் ப்ரெட் சாண்ட்விச்சும் இன்னொரு கையில் காபியும் எடுத்துக் கொண்டு வந்தார்.

சித்ராவின் முகம் வியப்பில் மலர்ந்தது.

“அட! ப்ரெட் சாண்ட்விச்சா?” என்றாள்.

“ஊம்…. உனக்காக நானே செய்தேன். ப்ரெட், பட்டர், ஜாம் சாண்ட்விச். சாப்பிட்டுப் பார். இந்தா கூடவே காபி” என்று டம்ளரை அவளிடம் கொடுத்துவிட்டு பக்கத்தில் அமர்ந்தார்.

“எப்படி இருக்கு?” குழந்தையின் ஆர்வத்துடன் கேட்டார்.

“சூப்பரா இருக்கு! என் இதெல்லாம் பண்றீங்க? பேசாம ரெஸ்ட் எடுத்துக்கலாமில்ல?” சித்ரா குரல் தழுதழுத்தது. கண்களில் நீர் தளும்பியது.

“சீ அசடு! எதுக்கு அழறே? நான் வேலை செய்றேன்னுட்டா?” அவளது கைகளைப் பிடித்துக் கொண்டு கேட்டார் சாரதி.

சித்ராவுக்கு பேச்சு வரவில்லை.

“சித்தும்மா….! நீ எனக்காக இத்தனை வருஷம் என்னவெல்லாம் செஞ்சுருக்கே. இவ்வளவு நாள்  உன் வேலைகளை பகிர்ந்துக்க முடியாம வேலைப் பளு என்னை அழுத்திட்டு இருந்தது. எனக்கு வீட்டுக் கவலை தெரியாமல் நீ பாத்துகிட்டதால ஆபீஸ்ல பெரிய பொறுப்பை நான் சுமக்க முடிந்தது. அதே போல இனிமே வீட்டை நான் பார்த்துக்கப் போறேன். நீ கவலைப் படாம போயிட்டு வா. இன்னிலேந்து ராத்திரி சமையல் ஐயாதான் பண்ணப் போறார். என்ன செய்யணும்னு சொல்லிரு. செஞ்சு வச்சுடறேன்.” என்றப மெல்ல அவளை அனைத்துக் கொண்டார். சித்ரா பேசாமலிருந்தாள்.

“என்ன ஓகேயா?” என்றார் மறுபடியும். “டபுள் ஓகே!” கிசுகிசுப்பாக வந்தது அவள் குரல்.

 

நெய்: ஆரோக்கியத்திற்கு மிக நல்லது

நெய்: ஆரோக்கியத்திற்கு மிக நல்லது

நெய்யை ‘அன்ன சுத்தி’ என்பார்கள். எதற்காக அன்னத்தை சுத்தம் செய்ய வேண்டும்? சமைக்கும் போது நாம் கோபப் பட்டால் நம்முடைய கோப தாபங்கள் அன்னத்திற்கு தோஷத்தை உண்டு பண்ணுமாம். அதனாலேயே பெரியவர்கள் சமைக்கும் போது ஸ்லோகங்கள் சொல்லிக்கொண்டே சமைக்க வேண்டும் என்பார்கள். சமைத்த உணவை கடவுளுக்கு நைவேத்தியம் பண்ணும்போது அதில் சிறிது நெய் சேர்ப்பது வழக்கம். நெய் அந்த உணவில் இருக்கும் தோஷத்தை போக்கி கடவுளின் படைப்புக்கு உகந்ததாக மாற்றி விடும்.

ஆங்கில வைத்தியத்தில் நெய் என்பது கொழுப்பு சத்து நிறைந்ததாக கருதப் படுகிறது. அதனால் அதை விலக்கச் சொல்லுகிறார்கள். ஆனால் ஆயுர்வேதம் நெய்யை மிகவும் உயர்ந்த பொருளாகக் கொண்டாடுகிறது. அதுவும் பசு நெய் பல்லாண்டு காலமாக மனிதனால் பயன்படுத்தப்படும் ஒரு உணவுப் பண்டம்; நெய்யைப்பற்றி ஆயுர்வேதம் இன்னும் என்ன சொல்லுகிறது என்று பார்ப்போம்.

  • நெய் நமக்கு ‘ஒஜஸ்’ என்கிற உயிர் சக்தியைக் கொடுக்கிறது.
  • நமது நினைவாற்றலுக்கும், நம் உடலின் நோய் எதிர்ப்பு சக்தியை ஊக்குவிக்கவும் உதவுகிறது.
  • தேனைப் போலவே நெய்யும் நமது உடலின் திசுக்களுக்குள் ஊடுருவி செல்லும் சக்தி படைத்தது.
  • அனைத்து நோய்களையும் தீர்க்கும் அற்புத நிவாரணி;
  • நம் உடலுக்குத் தேவையான உயிர் சக்தியை கொடுக்க வல்ல ஒரு ‘தங்கத் திரவம்’ என்று பசு நெய்யைப் புகழ்ந்து தள்ளுகிறது ஆயுர்வேதம்.

ஆனால் நெய் என்பது பாலின் தரத்தைப் பொறுத்து இருக்கிறது. கலப்படம் இல்லாத பால் ஒரு சாத்வீகமான, உடலுக்கும் மனதுக்கும் அமைதியைக் கொடுக்கும் உணவு.

ஆனால் தற்சமயம், நமக்குக் கிடைக்கும் பால் பரிசுத்தமானதா என்பது ஒரு கேள்விக் குறிதான். பால் அதிகம் கறக்க வேண்டும் என்று பசு மாடுகளுக்கு ஹார்மோன் ஊசிகள் போடுகிறார்கள். கால்நடை தீவனங்கள் ரசாயனக் கலவைகளால் ஆரோக்கியமானவையாக இருப்பதில்லை.  இதனால் கறவை மாடுகளும் அவற்றின் பாலும் மிகவும் பாதிக்கபடுகின்றன.

நல்ல சுத்தமான பாலிலிருந்து தயாரிக்கப்பட்ட தயிர், மோர், நெய் முதலியவை நம் உடலுக்கு போஷாக்கைக் கொடுப்பதுடன்  வியாதிகளைப் போக்கும் உணவுப் பொருட்களாகவும் இருக்கின்றன.

வெண்ணெயைக் காய்ச்சும் போது, அதிலிருந்து நம் உடலுக்குத் தேவையான நல்ல பாக்டீரியாக்களை ஊக்குவிக்கும் என்சைம்கள் வெளிப்படுகின்றன.  நெய்யின் தரம் வெண்ணெயின் தரத்தையும், நெய்யை நாம் எப்படி பாதுகாக்கிறோம் என்பதையும் பொறுத்து இருக்கும்.

 

சிறந்த வகையில் நெய் எடுக்கும் முறை:

  • வெண்ணை காய்ச்சும் வாணலி, நெய்யை பரிமாற தேவையான ஸ்பூன், நெய்யை வைக்கும் பாத்திரம் இவைகளை முதலில் கொதிக்கும் நீரில் (sterilize) போட்டு கிருமிகள் இன்றி எடுத்து வைக்கவும்.
  • வாணலியில் வெண்ணையைப் போட்டு குறைவான தீயில் வைக்கவும்.
  • வெண்ணை உருகி பிரவுன் நிற நுரை மேலே வரும். வெண்ணை காயும் போது அதை கரண்டி அல்லது ஸ்பூன் கொண்டு கிளறக் கூடாது.
  • நுரையை வெளியில் எடுக்கவும் கூடாது.
  • நுரை கொஞ்சம் கொஞ்சமாக கெட்டிப் பட்டு வாணலியின் அடியில் போய் வண்டலாகத் தங்கிவிடும்.
  • நெய் தங்க நிறமாக மாறி சத்தமில்லாமல் கொதிக்க ஆரம்பிக்கும்.
  • நெய்யின் மேல் சின்னச்சின்ன காற்றுக் குமிழிகள் வரும்.
  • இப்போது வாணலியை அடுப்பிலிருந்து இறக்கி நெய்யை நன்றாக ஆறவிடுங்கள்.
  • சுத்தம் செய்யப்பட்ட பாத்திரத்தில் நெய்யை வண்டல் இல்லாமல் விடவும்.

வண்டல் பிடித்தவர்கள் அப்படியே சாப்பிடலாம். இல்லாவிடில் வண்டலுடன் சிறிதளவு கோதுமை அல்லது அரிசி மாவு, சிறிது சர்க்கரை போட்டு பிரட்டி சாப்பிடலாம். அருமையாக இருக்கும்.