வீட்டு உபயோகப் பொருட்களில் சிக்கனம்

வீட்டு உபயோகப் பொருட்களில் சிக்கனம்:

சமீபத்தில் நண்பர் ஒருவரின் ‘புதுமனை புகும் விழா’ வுக்குச் சென்றிருந்தேன். “3 படுக்கை அறைகள் – with attached bath…… வீடு முழுவதும் சுமார் 100 மின்சார இணைப்புகள்… plug points,  மின்விளக்கு, மற்றும் மின் விசிறி வசதியுடன்…….நீங்கள் எங்கு உட்கார்ந்து வேண்டுமானாலும்  படிக்கலாம்; உங்கள் தலைக்கு மேல் மின் விளக்கு, மின் விசிறி இருக்கும். கைபேசியை சாரஜ் செய்யலாம்….”என்று பெருமையுடன் வீட்டைச்சுற்றி காண்பித்தார்.

நம் எல்லோருக்கும் சகல வசதிகளுடன் கூடிய வீடு என்பது பெரிய மகிழ்ச்சி தரும் விஷயம் தான். ஆனால் அத்தனை வசதிகளும் மின்சார கட்டணமாக நமக்கே திரும்பி வரும்போதுதான்  ஒவ்வொரு வசதிக்கும் நாம் கொடுக்கும் விலை என்ன என்று தெரியும். நாம் ஒவ்வொருவரும் நமது வருவாயில் 6% முதல் 12% வரை வீட்டு உபயோகப் பொருட்கள் வாங்குவதிலும், அவற்றை பராமரிப்பதிலும், அவற்றுக்கான கட்டணங்களை கட்டுவதற்கும் செலவிடுகிறோம். வாழ்க்கைத்தரம் உயர உயர இந்தச் செலவுகள் அதிகமாகிக்கொண்டே  போகிறது.

ஒரு காலத்தில் செல்வந்தர்கள் மட்டுமே உபயோகித்து வந்த பல பொருட்கள் இப்போது அத்யாவசியம் என்றாகிவிட்டது. மிக்ஸி, கிரைண்டர், பிரிட்ஜ் தவிர நாம் அன்றாடம் பயன் படுத்தும் பல பொருட்கள் மின்சாரம் சார்ந்த பொருட்களாகவே இருக்கின்றன. இப்பொருட்கள் இல்லை என்றால் எதுவுமே செய்ய முடியாது என்கிற நிலை இல்லை என்றாலும், கணவன் மனைவி இருவரும் சம்பாதிப்பதால், இந்தப் பொருட்களின் மீதான செலவுகளை பற்றி அதிகம் கவலைப் படுவதில்லை; மேலும் இந்தப் பொருட்களினால் வீட்டு  வேலையையும் துரிதமாக முடிக்க முடிகிறது.

இம்மாதிரி பொருட்கள் வேண்டாம் என்று சொல்ல முடியாது ஆனால் இவற்றை பயன்படுத்தும் போது சில சிக்கன நடவடிக்கைகளை மேற்கொள்ளுவதனால் மின்சார கட்டணத்தை சற்று குறைக்கலாம்.

மின்சார சேமிப்பு:

  1. 1.       சாதாரண பல்புகளுக்குப் பதிலாக Compact Fluroscent Bulb பயன்படுத்தலாம்:

இம்மாதிரியான பல்புகள் சாதாரண பல்புகளை விட 75% குறைந்த மின் சக்தியைப் பயன் படுத்துகின்றன. அதுமட்டுமல்ல; இவ்வகை பல்புகள் சாதாரண பல்புகளை விட 10 மடங்கு அதிக காலம் நீடித்து உழைக்கின்றன. அதனால் அடிக்கடி பல்புகளை மாற்ற வேண்டிய அவசியம் இல்லை. குறைந்த செலவில் நிறைந்த வெளிச்சத்தை கொடுக்கின்றன.

  1. தேவையில்லாத மின்விளக்கு, மின்விசிறி முதலியவற்றை அணைக்கவும். குழந்தைகளுக்கும் இந்தப் பழக்கத்தை ஏற்படுத்துங்கள். இரவில் படுக்கப் போகும்போது வேண்டாத ப்ளக் ஸ்விட்ச்களை அணைக்கவும். கைபேசி சாரஜ் ஆனவுடன் ப்ளக் இணைப்பை துண்டிக்கவும். தற்போது கிடைக்கும் வாஷிங் மெஷின்கள் துணி துவைத்து முடித்தவுடனும், குடி நீர் கெட்டில், குளியலறை கெய்சர் ஆகியவை நீர் சுட்டவுடனும்  தாமாகவே அணைந்து விடுகின்றன என்றாலும் ப்ளக் இணைப்பை துண்டிப்பது நல்லது.

நீரை சேமிக்க வழிகள்:

  1. மழை நீர் சேமிப்பு நம் வீட்டுக்கு மட்டுமல்ல; நாட்டுக்கும் நல்லது. நிலத்தடி நீரை அதிகரிக்கவும் உதவும்
  2. குளிப்பதற்கு  ஷவர் அல்லது பக்கெட் பயன்படுத்துங்கள். பாத்டப் குளியல் வாரத்திற்கு ஒரு நாள் என்று வைத்துக்கொள்ளலாம். கழிவறையில் ஃபளஷ் பயன்படுத்தும் போதும் கவனம் தேவை. அங்கும் சின்ன வாளியைப் பயன்படுத்தலாம்; தப்பில்லை.
  3. சில வாஷிங் மெஷின்களில் ‘save water’ என்று இருக்கும். நிறைய துணிகள் துவைக்கும் போது அதைப் பயன்படுத்தலாம். இரண்டாவது முறை துவைத்தவுடன் வெளி வரும் நீரை வாசல் கழுவ பயன்படுத்தலாம். மிதியடிகள், கைப்பிடி துணிகளை முதல் முறை இந்தத் தண்ணீரில் துவைத்து கடைசியாக நல்ல தண்ணீரில் அலசலாம்.
  4. கைபேசியில் கால் வெய்ட்டிங், காலர் டியூன், இணைய இணைப்பு முதலியவற்றை தவிர்ப்பது மாதாமாதம் கைபேசியின் கட்டணத்தை குறைக்க உதவும். உங்களுக்கு உதவும் வகையில் கைபேசி இணைப்பை (plan) தேர்ந்தெடுத்து கொள்ளவும்.

உங்கள் வீட்டு தொலைக்காட்சிக்கு கேபிள் இணைப்பை விட DTH (Direct to Home) இணைப்பு அதிக பயன் தரும். உங்களுக்கு வேண்டிய சானல்களைத் (package) தேர்ந்து எடுத்துக் கொள்ளலாம். DTH இல் ஒயர்லெஸ் மூலம் நிகழ்ச்சிகள் நேரடியாக சாட்டிலைட் வழியாக ஒளிபரப்பு ஆவதால் கேபிள் தேவைப் படுவதில்லை. நீங்கள் பார்க்கும் சானல்களுக்கு மட்டும் பணம் கொடுத்தால் போதும்.

சமையல் எரிவாயுவில் சிக்கனம்:

சமையல் எரிவாயுவின் விலையைப் பார்த்தால் பயமாக இருக்கிறது. சமைக்காமலோ, சாப்பிடாமலோ இருக்க முடியாதே! இதோ சில சிக்கன டிப்ஸ்:

  1. அகலமான பாத்திரங்களைப் பயன்படுத்தவும்.
  2. சாம்பாரோ, ரசமோ கொதித்தவுடன் அடுப்பைக் குறைக்கவும். மிதமான சூட்டில் காய்கறிகளைச் சமைக்கும்போது அவற்றின் சத்துக்கள் அழிவதில்லை.
  3. அடுப்பில் தீயின் நிறம் நீலமாக இருக்க வேண்டும். மஞ்சள் நிறத்தில் தீ இருப்பது பர்னர் சரியில்லை என்பதைக் காட்டுகிறது. அடுப்பை நல்ல நிலையில் வைத்திருப்பது எரிவாயு சேமிப்புக்கு உதவும்.
  4. சிலிண்டரை பயன்படுத்தாத போது மூடி வைப்பது வாயுக் கசிவை குறைக்கும். இரவில் கட்டாயம் சிலிண்டரை மூடவும்.
  5. சமைத்த உணவை மறுபடியும் சுட வைக்க மைக்ரோவேவ் அவனை (microwave oven) பயன்படுத்தவும். சுட்ட அப்பளத்தில் பொறித்த அப்பளத்தின் சுவை வேண்டுமா? அப்பளத்தின் மேல் சிறிது எண்ணெய் தடவி மைக்ரோ அவனில் வைத்து எடுங்கள்.

சிறுதுளி பெருவெள்ளம்; சின்னச்சின்னதாக சேமிக்கலாம்; சிறுகக் கட்டி பெருக வாழலாம்.

 

 

published in a2ztamilnadunews.com

வெள்ளரிக்காயின் நற்பண்புகள்

வெள்ளரிக் காயை விரும்பாதவர்கள் மிகச் சிலரே. அதுவும் பிஞ்சு வெள்ளரி என்றால் பெரியவர் முதல் குழந்தைகள் வரை அனைவருக்கும் பிடித்த காய் இது. சமைக்காமலேயே சாப்பிடக் கூடிய காய்கறிகளில் இதுவும் ஒன்று. வெள்ளரிப் பச்சடி, வெள்ளரி துவையல் என்று பலவிதமாக சமைக்கவும் செய்யலாம். நீர் நிறைந்த காய், கலோரி குறைந்தது என்பதனால் உணவு கட்டுப் பாட்டில் இருப்பவர்களும் இதனை விரும்பி சாப்பிடுவார்கள். சாப்பிடும் பொருளாக மட்டுமில்லாமல் வேறு பலவிதங்களிலும் இதனை பயன் படுத்தலாம்.

  • வெள்ளரிக் காயில் ஒரு நாளைக்கு நமக்குத் தேவையான வைட்டமின் B1, B2, B3, B5, B6, போலிக் ஆசிட், வைட்டமின் C, கால்சியம், மக்னேசியம், பாஸ்பரஸ், பொட்டாசியம் மற்றும் ஜிங்க் ஆகிய அத்தனை சத்துப் பொருட்களும் இருக்கின்றன.
  • மதிய நேரத்தில் உண்டாகும் சோம்பலைப் போக்க காப்பி குடிப்பவரா நீங்கள்? காப்பிக்கு பதில் ஓர் வெள்ளரிக் காயை சாப்பிடுங்கள். இதில் இருக்கும் வைட்டமின் B யும், கார்போஹைடிரெட்டும் சட்டென்று ஒரு புத்துணர்ச்சியைக் கொடுக்கும். இப் புத்துணர்ச்சி நீண்ட நேரம் நிலைத்தும் இருக்கும்.
  • குளித்து முடித்தவுடன் குளியலறைக் கண்ணாடியில் நீர்படலம் படிந்துள்ளதா? ஒரு வெள்ளரித் துண்டத்தை எடுத்து கண்ணாடியில் தேய்க்கவும். நீர்படலம் மறைவதுடன், வெள்ளரியின் மணமும் குளியலறையில் வீசும்.
  • உங்களது அருமையான தோட்டத்தில் செடிகள் பயிரிட என்று தயார் செய்து வைத்திருக்கும் இடங்களில் பூச்சிகள் தொல்லையா? சிறு சிறு அலுமினியக் கிண்ணங்களில் வெள்ளரித் துண்டங்களை போட்டு ஆங்காங்கே வைத்துவிடுங்கள். வெள்ளரியிலிருந்து வெளி வரும் நீர் அலுமினியத்துடன் கலந்து ஒரு வாசனையைப் பரப்பும். மனிதர்களால் நுகர முடியாத இந்த வாசனைக்கு பூச்சிகள் ஓடிவிடும்.
  • முதல் நாள் இரவு பார்ட்டி முடிந்து வரும் ‘hangover’ அல்லது தலையைப் பிளக்கும் தலைவலி இவற்றைப் போக்க  படுக்கப் போகுமுன் சில வெள்ளரித் துண்டங்களை சாப்பிடுங்கள். வெள்ளரியில் இருக்கும் வைட்டமின் B, சர்க்கரைச் சத்து மற்றும் மின் அயனிகள் (electrolytes) உடலுக்குத்  தேவையான சத்தை கொடுப்பதுடன் உடலை சம நிலையில் வைக்கவும், ‘hangover’, மற்றும் தலை வலியைப் போக்கவும் உதவும்.
  • களைப்புற்ற கண்களுக்கு புத்துணர்வு கொடுக்கவும், கண்ணின் கீழ் காணும் கருவளையங்களை போக்கவும் வெள்ளரி உதவுகிறது.
  • நம் உடலில் ஆங்காங்கே தெரியும் வேண்டாத மடிப்புகளையும் ‘டயர்’ களையும் குறைக்க வெள்ளரி உதவுகிறது. வெள்ளரித் துண்டங்களை இந்த இடங்களில தேய்க்க வெள்ளரியில் உள்ள பைடோ கெமிக்கல்ஸ் சருமத்தில் உள்ள கொலோஜென்னை இறுக்குவதுடன், மடிப்புகளை குறைத்துத் தோற்றமளிக்க செய்கிறது.
  • சாயங்காலத்தில் ஏதாவது சாப்பிட வேண்டும் போல் இருந்தால் வெள்ளரிக் காயை நறுக்கி சிறிது உப்பு, காரப் போடி போட்டு சாப்பிடலாம். மிகக் குறைந்த விலையில் கிடைக்கும் அருமையான ஸ்நாக் இது.
  • அவசரமாக ஒரு மீடிங்க்குக்குப் போக வேண்டும்; ஷூ பாலீஷ் போட நேரம் இல்லையா? வெள்ளரித் துண்டத்தை ஷூக்களின் மீது தேய்க்க, ஷூக்கள் பள பள!
  • கதவுகளின் கீல்கள் க்றீச் க்றீச்? வெள்ளரித் துண்டத்தை எடுத்து கீல்களின் மேல் தேய்க்க, க்றீச் க்றீச் மாயம்!
  • அலுவலகத்திலும், வீட்டிலும் வேலை செய்து செய்து அலுத்து விட்டதா? அழகு நிலையம் போக முடியவில்லையா? கவலை வேண்டாம்: இருக்கவே இருக்கிறது வெள்ளரி மசாஜ்: ஒரு முழு வெள்ளரியை வளையம் வளையமாக நறுக்கி கொதிக்கும் நீரில் போடவும். அதிலிருந்து வரும் ஆவியைப் முகத்தில் பிடிக்க அலுப்பு போயே போச்! இது குழந்தை பெற்ற புது தாய்மார்களுக்கும், காலேஜ் மாணவிகளுக்கு பரீட்சை சமயத்திலும் மிகவும் உதவியாக இருக்கும்.
  • அலுவலக பார்ட்டியா? மேலதிகாரியுடன் பேசிக் கொண்டே சாப்பிட்டதில் கடைசியாக பான் போட மறந்து விட்டீர்களா? ஒரு வெள்ளரித் துண்டத்தை எடுத்து நாக்கின் மேல் 30 நொடிகள் வைத்திருங்கள். வெள்ளரியில் இருக்கும் பைடோ கெமிக்கல்ஸ் வாய் துர்நாற்றத்தைப் போக்கும் வல்லமை வாய்ந்தது.
  • குழாய்கள், ஸ்டெயின்லஸ் ஸ்டீல் சிங்க் முதலியவற்றை கழுவ ‘சுற்றுச் சூழல்’ நண்பனான ஒரு கிருமி நாசினி வெள்ளரிக்காய் தான். வெள்ளரித் துண்டங்கள் விடாப் பிடி கரையைப் போக்குவதுடன், கைகளுக்கும் நல்லது.
  • பேனாவினால் எழுதியதை அழிக்கவும், உங்கள் சுட்டிப் பெண்ணின் சுவர் சித்திரங்களை அழிக்கவும் வெள்ளரி ஒரு அருமையான அழிப்பான்.

published in a2ztamilnadunews.com

நெடுந்தூர ஓட்டப் போட்டிக்குத் தயாராகுதல்

நெடுந்தூர ஓட்டப் போட்டிக்குத் தயாராகுதல்

மாரத்தான் அல்லது நெடுந்தூர ஓட்டம் என்பது சாதாரண ஓட்டப் பந்தயங்களிலிருந்து மிகவும் மாறுபட்ட ஒன்று. கி.மு.490 இல் கிரேக்க நாட்டிற்கும் பெர்ஷிய நாட்டிற்கும் இடையே நடந்த போர் மாரத்தான் போர் (Battle of marathon) என்று  அழைக்கப் பட்டது. போரில் கிரேக்க நாடு ஜெயித்தவுடன் அந்தச் செய்தியை Pheidippides என்கிற ஓட்டக்காரர் மூலம் ஏதன்ஸ் நகருக்கு அனுப்பினார்கள். அவரும் ஏதன்ஸ் நகரம் வரை ஓரிடத்தில் கூட நிற்காமல் ஓடியே வெற்றிச் செய்தியை அறிவித்துவிட்டு கிழே விழுந்து இறந்து போனார்.

இதன் காரணமாகவே  இந்த ஓட்டத்திற்கு இப்பெயர் வந்தது. இந்த ஓட்டமும் கிட்டத் தட்ட ஒரு போர் தான்! ஒரு போரில் வெல்ல விரும்பும் வீரர்கள் எப்படி கடும் பயிற்சி மேற்கொள்ளுவார்களோ அதே போலவே இதற்கும் கடுமையான பயிற்சி தேவை படுகிறது. ஓட்ட வீரர்கள் இந்த மாரத்தான் ஓட்டத்தில் 42.195 கி.மி. ஓடுகிறார்கள். நின்று போயிருந்த ஒலிம்பிக் விளையாட்டு போட்டிகள் 1896 இல் மறுபடி ஆரம்பிக்கப் பட்ட போது மாரத்தான் ஓட்டம் அதில் புதிதாக சேர்க்கப்பட்டது. 1921 இல் தான் இத்தனை தூரம்  42.195 கி.மி.    ஓடவேண்டும் என்பது நிர்ணயிக்கப் பட்டது.  ஒவ்வொரு வருடமும் மாரத்தான் ஓட்டப் பந்தயம் உலகின் பல பகுதிகளிலும் சுமார் 500 முறை நடை பெறுகிறது. பல தொண்டு நிறுவனங்கள் மாரத்தான் ஓட்டப் பந்தயத்தை தங்களின் நல்லெண்ணத்தை தெரிவிக்கப் பயன்படுத்துகிறார்கள். இந்த ஓட்டப் பந்தயத்தில் ஓட்டப் பந்தய வீரர்களைத் தவிர பொது மக்களும் கலந்து கொள்ளுகிறார்கள்.

நீங்களும் மாரத்தான் ஓட வேண்டுமா? முதல் முறையாக ஒடுபவர்களுக்கான சில டிப்ஸ் இதோ:

உணவு முறை
மாரத்தான் ஓடுவதற்கு முன், ஓடும்போது, ஓடி முடித்தபின் என மூன்று கட்டங்களிலும் உணவு கட்டுப்பாடு தேவை. புரதச் சத்து, மாவுச் சத்து, மினரல்ஸ், விட்டமின்ஸ் மிகுந்த உணவுகள் உங்களுக்கு வேண்டிய அதிக சக்தியைக் கொடுக்கும்.  மாவுச் சத்து நிறைந்த உணவு உங்களுக்கு ஓட்டத்திற்கு வேண்டிய பலத்தைக் கொடுப்பதுடன், ஓட்டம் முடிந்தவுடன் நீங்கள் அதிக அயர்ச்சி அடையாமல் இருக்கவும் வைக்கிறது. பயிற்சியின் போதும், மாரத்தான் ஓடும்போதும் இந்த மாவுச் சத்து உணவு தேவை.முழு தானியங்களால் ஆன பாஸ்தா,பிரெட்,
ஆப்பில், சீரியல்ஸ் முதலிய உணவுகள் அதிக மாவுச் சத்து நிறைந்தவை. ஆல்கஹால் உட்கொள்ளுவதை தவிர்ப்பது நல்லது. ஆல்கஹால் உங்கள் உடம்பில் இருக்கும் நீரை வற்றச் செய்கிறது. சரிவரப் பயிற்சி செய்வது இதனால் தடைப் படும்.

தண்ணீர்: உணவுக்கு அடுத்தபடி நிறைய தண்ணீர் குடிப்பது அவசியம். ஓட்டப் பயிற்சியின் போதே நீர் குடிக்க பழகுங்கள். நீங்கள் இழக்கும் ஒவ்வொரு 500 gms எடைக்கும் அதை ஈடுகட்ட 450 மி.லி. திரவம் தேவை. முதலிலிருந்தே நீர் குடிக்கப் பழகுவது நல்லது. அதிக தூரம் ஓடும்போது வழக்கமில்லாமல் நீர் குடித்தால் நீங்கள் வாந்தி எடுக்கக் கூடும். அதிக நீர் குடிப்பதும் கூடாது. விளையாட்டு வீரர்கள் குடிக்கும் சோடியம், பொட்டாசியம் நிறைந்த பானங்களைக் குடிக்க வேண்டாம். இவ்வகை பானங்கள் உங்கள் வயிற்றை பாதிக்கக் கூடும்.

மாரத்தான் ஓட்டத்திற்குத் தேவையான பொருட்கள்:
ஓட்டப் பந்தயத்திற்கு தேவையான  காலணிகள், காலுறைகள், தலைக்கு அணியும் கேப், ரன்னிங் கிட்  எல்லாவற்றையும் தயாராக எடுத்து வைத்துக் கொள்ளுங்கள். புத்தம் புதிய காலணிகள் வேண்டாம். பழகின காலணிகள் உங்கள் ஓட்டத்திற்கு உங்களுடன் நன்றாக ஒத்துழைக்கும். உடலை உறுத்தாத, தளர்வான ஆடைகள் அணியுங்கள்.

உறக்கம்: பயிற்சியின் போது ஒவ்வொரு நாளும் 8 மணி நேரத் தூக்கம் அவசியம். தேவையான ஓய்வும் முக்கியம்.  கடுமையான பயிற்சி, சத்தான உணவு, வேண்டிய அளவு நீர் குடித்தல் இவற்றுடன் ஓய்வும், நல்ல ஆழ்ந்த, அமைதியான உறக்கமும் சேர்ந்தால், உங்கள் முதல் மாரத்தான் ஓட்டம் வெற்றிகரமாக முடிவடையும்.

ஓட்டப் பந்தயத்திற்கு முன் ஒரு முறை ஓட்டப் பந்தயப் பாதையை பார்வை இடுவது சிறந்தது. இதனால் நீங்கள் ஓடும் பாதையை பற்றிய விவரம் உங்களுக்குத் தெரிய வரும்.  ஓட்டப் பந்தயம் நடக்கவிருக்கும் சாலையின் அமைப்பு, சாலையின் திருப்பங்கள், பாதை முடிவுகள் எந்தவிதமான வாகனங்கள் அந்த சாலையில் வரக் கூடும், கார்கள் நிறுத்துமிடங்கள் போன்றவற்றை முன்னமே அறிந்து கொள்ளுவது உங்கள் ஓட்டத்தை தங்கு தடையின்றி முடிக்க உதவும். கடைசி சில அடி தூரத்தை அறிந்து கொள்ளுவது, எப்போது உங்கள் வேகத்தைக் கூட்ட வேண்டும் என்று முன்னமேயே திட்டமிட உதவும்.

மாரத்தான் தினத்தன்று: பந்தய நாள் அன்று காலை நீண்ட தூர ஓட்டத்திற்காக உங்கள் உடலை தயார்செய்ய warm-up பயிற்சிகளை செய்யுங்கள். நின்ற இடத்திலேயே ஓடுவது போன்ற (dynamic warm-up)  பயிற்சிகள் செய்வது மூட்டுக்களுக்கும், தசைகளுக்கும் இரத்த ஓட்டத்தை அதிகரிக்கும். ஆனாலும், இது நாள் வரை செய்யாத எந்தப் புதுப் பயிற்சியையும் செய்ய வேண்டாம். திடீரென்று உணவு முறையை மாற்றுவதோ, காலணி முதலானவற்றை மாற்றுவதோ கூடாது. கடைசி நேர மாறுதல்கள் எதுவும் வேண்டாம்.

ஓடும் போது:

  • முதல் தடவையாக ஓடுவதால், பலர் உங்களை முந்திக் கொண்டு ஓடுவது பற்றிக் கவலை வேண்டாம்.
  • போகிற போக்கில் சிலர் உங்களைத் தள்ளிவிட்டுப் போகக் கூடும். கவனம் தேவை.
  • உங்களால் எவ்வளவு வேகத்தில் ஓட முடியுமோ அதே வேகத்தில் ஓடவும்.
  • ஒரே சீரான தாள கதியில் ஓடுங்கள். மற்றவர்களை முந்திச் செல்ல நினைக்காதீர்கள்.
  • முதல் பாதி தூரத்தை கடந்த பிறகு உங்கள் வேகத்தைக் கூட்டுங்கள்.
  • கடைசி சில கிலோ மீட்டர்களுக்காக உங்கள் சக்தியை சேமியுங்கள்.
  • சின்ன சின்ன இலக்குகள் வைத்துக் கொண்டு ஓடிக் கொண்டே இருங்கள்.
  • சுற்றுபுறத்தை பார்த்துக் கொண்டே ஓடுவது  நீண்ட தூர ஓட்டத்தை சுலபமாக்கும்.

ஒருநிலைபாட்டுடன் பயிற்சி செய்வது, உணவு, நீர், உடை இவற்றில் கவனம் செலுத்துவது மிகவும் இன்றியமையாதது. உங்களது முதல் மாரத்தான் ஓட்டம் முழுமையாக முடிவடைய வாழ்த்துக்கள்!

 

published in a2ztamilnadunews.com

வீட்டு வைத்தியம்

வீட்டு வைத்தியம்

என்னதான் நவீன சிகிச்சைகள் வளர்ந்து கொண்டே போனாலும் இந்த 21 ஆம் நூற்றாண்டிலும் பலர் பாட்டி வைத்தியத்தை விடாமல் பின்பற்றத் தான் செய்கிறார்கள். பாட்டிகள் தங்கள் அனுபவத்தில் இந்த வைத்திய முறைகளை செய்து பார்த்து பலன் கிடைத்தவுடன் தங்கள் வீட்டில் உள்ள இளைய தலை முறைக்கும் சொல்லிக் கொடுத்தனர். வீட்டில் உள்ள, குறிப்பாக சமையல் அறையில் அஞ்சரை பெட்டியில் இருக்கும், தினமும் சமையலுக்கு உபயோகிக்கும் பொருட்களைக் கொண்டே தங்களுக்கு வரும் சின்ன சின்ன நோய்களுக்கு தீர்வு கண்டனர் நம் பாட்டிகள். அதனால் இந்த சிகிச்சை முறை வீட்டு வைத்தியம் என்றும் சொல்லப்படுகிறது.

சாதாரண ஜலதோஷம், இருமல், சளி போன்றவற்றிற்கு (வேறு தொந்திரவு எதுவும் இல்லாத போது) சித்தரத்தை, மிளகு, சீரகம் முதலியவற்றை நீரில் போட்டு கொதிக்க வைத்து கஷாயம் தயாரித்துக் குடிக்கலாம் என்பதிலிருந்து பலவித வைத்திய முறைகள் வீட்டு வைத்தியத்தில் உண்டு. வயிற்றில் இருக்கும் பூச்சிகள் போக மாதம் ஒரு முறை விளக்கெண்ணெய் சாப்பிட்டால் நல்லது. சின்னக் குழந்தைகளுக்கு கூட தாய்ப் பாலில் சிறிது விளக்கெண்ணெய் சேர்த்து குழைத்துக் கொடுப்பது பாட்டிமார்களின் வழக்கம். வசம்பு ‘பிள்ளை வளர்ப்பான்’ என்றே அழைக்கப்பட்டது. தினமும் வசம்பை கல்லில் உரைத்து குழந்தையின் நாக்கில் தடவினால் குழந்தை ஆரோக்கிய மாக வளரும் என்று நம்பினார்கள்.

ஆனால் தற்போது மருத்துவர்கள் இந்த சிகிச்சை முறைகளை   ஒத்துக்கொள்ளவதில்லை. அந்தக் காலம் போல இப்போது தூய்மையான விளக்கெண்ணெய் கிடைப்பதில்லை. அதனால் சின்னக் குழந்தைகளுக்கு விளக்கெண்ணெய் கொடுப்பதால் தொற்றுநோய் ஏற்படும் என்கிறார்கள். அதுவும் சரிதான்; கலப்படமற்ற பொருட்கள் இப்போது எங்கே கிடைக்கிறது? குழந்தை பிறந்தவுடன் பிரசவமான பெண்ணுக்குக் கொடுக்கும் பிரசவ லேகியம் கூட வேண்டாம் என்கிறார்களே!

இத்தனை இருந்தாலும் பத்திரிகைகளில் பாட்டி வைத்தியம் என்று வந்து கொண்டுதான் இருக்கிறது. ஆங்கில மருந்துகள் ஒத்துக் கொள்ளாத போது, அல்லது பக்க விளைவுகள் அதிகமாகும் போது சிலர் alternative medicine எனப்படும் ஹோமியோபதி, ஆயுர்வேதம், சித்த வைத்தியம், அல்லது இயற்கை வைத்தியம் போன்றவற்றை நாடுகிறார்கள். இவற்றில் ஹோமியோபதி தவிர மற்ற வைத்தியங்களில் பாட்டி மருத்துவத்தைப் போலவே வீட்டில் இருக்கும் பொருட்களை மையமாக வைத்தே மருந்துகள் தயாரிக்கப் படுகின்றன.

இதோ உங்களுக்காக சில வீட்டு வைத்திய குறிப்புகள்:

ஒரு எச்சரிக்கை: இந்த குறிப்புகள் மருத்துவர்களால் ஒப்புக் கொள்ளப்பட்டவை என்று சொல்ல முடியாது. அதிக இரத்த அழுத்தம், இதய நோய், சர்க்கரை நோய் அல்லது வேறு நோய்களுக்கு தொடர்ந்து மருந்து சாப்பிடுபவர்கள் இவற்றை முயற்சி செய்யவேண்டாம்.

அசிடிட்டி நோய்க்கு அரிசி:

  • பச்சை அரிசி 8 அல்லது 10 மணிகளை எடுத்துக் கொண்டு தினமும் காலையில் காலை சிற்றுண்டி சாப்பிடுவதற்கு முன் நீருடன் விழுங்கவும்.
  • 21 நாளைக்கு விடாமல் தொடர்ந்து செய்ய மூன்று மாதத்தில் அசிடிட்டி உங்களை விட்டு சொல்லாமல் கொள்ளாமல் ஓடி விடும்.
  • இந்த சிகிச்சை முறையால் உடலில் இருக்கும் ஆசிட் அளவு நாளடைவில் குறைந்து விடும்.

கொலஸ்ட்ரால் குறைய கொட்டைப்பாக்கு

உயர் இரத்த அழுத்தம், சர்க்கரை நோய் இவற்றுடன் கூட வரும் கொலஸ்ட்ரால் குறைய இதோ ஒரு வீட்டு வைத்தியம்:

  • வாசனை சேர்க்காத கொட்டைப் பாக்கை சிறு சிறு துண்டுகளாக்கி ஒவ்வொரு சாப்பாட்டிற்கு பிறகு 20-40 நிமிடங்கள் வாயில் போட்டு மெல்லவும்.
  • கடிக்க வேண்டாம்; நன்றாக மென்றவுடன் பாக்கை வெளியே துப்பி விடுங்கள்.
  • பாக்கிலிருந்து வரும் ஜூஸ் உமிழ் நீருடன் கலந்து இரத்தத்தின் கொழுப்பை குறைக்கிறது.  இரத்த ஓட்டம் சீராகிறது; இரத்த அழுத்தமும் குறைகிறது.

உயர் இரத்த அழுத்தத்திற்கு மெந்தியம்:

உயர் இரத்த அழுத்தத்தைக் குறைக்க மெந்தியம் மிகச் சிறந்த மருந்தாகக் கருதப் படுகிறது.

  • 8-10 மெந்திய மணிகளை எடுத்துக் கொள்ளவும்;
  • தினமும் காலையில் சிற்றுண்டிக்கு முன் தண்ணீருடன் விழுங்கவும்.

சர்க்கரை நோய்க்கு 2 வைத்திய முறைகள்:

முதல் முறை: black tea எனப்படும் பால் கலக்காத தேனீர்

சர்க்கரை நோய் இருப்பவர்களுக்கு முதலில் பாதிக்கப் படும் உறுப்பு சிறுநீரகம் தான். இவர்கள் தினமும் காலையில் கறுப்பு தேனீர் குடிக்கலாம்.

  • தேயிலைகளை தண்ணீரில் போட்டுக் கொதிக்க விடவும்.
  • பாலோ, சர்க்கரையோ, எலுமிச்சம் சாரோ சேர்க்காமல் குடிக்கவும்.
  • சிறுநீரகத்தின் செயல் பாட்டை சரி செய்யும் சக்தி இந்தக் கறுப்பு தேனிருக்கு உண்டு.

இரண்டாவது சிகிச்சை:

  • இளம் வெண்டைக்காயை காம்பை நீக்கி விட்டு நீள வாக்கில் அரிந்து கொள்ளவும்.
  • இரவு தண்ணீரில் ஊறப் போடவும்.
  • காலை சிற்றுண்டிக்கு முன் வெண்டைக்காய் ஊறிய தண்ணீரை குடித்து விடவும்.  வெண்டைக்காய் ஊறியதால் தண்ணீர் சிறிது கொழ கொழப்பாக இருக்கும். இந்தக் கொழ கொழுப்பு இரத்தத்தில் இருக்கும் சர்க்கரையை கட்டுக்குள் கொண்டு வரும்.
  • ஊறிய வெண்டைக்காயையும் அப்படியே சாப்பிட்டு விடலாம்.

பொதுவான சில வீட்டு வைத்தியங்கள்:

  • நடு இரவில் சில சமயம் வாயுத் தொல்லையினால் வயிற்று வலி வரும். சூடான நீர் சாப்பிடுவது வாயுவை வெளியேற்றுவதுடன், வலியையும் குறைக்கும்.
  • ஜலதோஷம் பிடிக்கும் அறிகுறிகள் தோன்றுகிறதா? தண்ணீரில் ஒரு ஸ்பூன் மிளகு போட்டு கொதிக்க வைத்துக் அவ்வப்போது குடித்து வர ஜலதோஷம் உங்களைப் பிடிக்காமல் பார்த்துக் கொள்ளலாம்.

இந்தக் குறிப்புகளின் பலன்கள் மருத்துவ ஆராய்ச்சி மூலம் நிருபிக்கப் படவில்லை என்றாலும், இவை எந்தவிதமான பக்க விளைவுகளையும் ஏற்படுத்துவதில்லை என்பது நிஜத்திலும் நிஜம்.

 

 

published in a2ztamilnadunews.com

வாலண்டைன்ஸ் டே

இன்று வாலண்டைன்ஸ் டே. இளம் காதலர்களுக்கு வாழ்த்துக்கள்!

காதல் என்பது இரு நெஞ்சங்கள் இணைந்து, பகிர்ந்துகொள்ளளும் ஒரு உணர்வு. ஒருவரையொருவர் புரிந்துகொள்ளுதல் என்பது இதன் முக்கிய அங்கம். ஒருவரையொருவர் அப்படியே குறை நிறைகளுடன் ஏற்றுக் கொள்ளுதல் அடுத்த கட்டம். குறைகளை தன் மனம் கவர்ந்தவளுக்காக அல்லது ‘வனுக்காக’ மாற்றிக் கொள்ள முயலலாம். அல்லது நிறைவை நிறைவாக நினைத்துக் குறைகளை மன்னிக்கவும் மறக்கவும் செய்யலாம். எதானாலும் உனக்காக நான், எனக்காக நீ, என்று வாழ்வாங்கு வாழலாம்.

நம் இதிகாச புராணங்கள் பல காதல் கதைகளைச் சொல்லுகின்றன. ஸ்ரீ ராமாயணத்தில் பட்டாபிஷேக காட்சி. பட்டாபிஷேகம் நல்லபடியாக நடந்தேறியது. எல்லோருக்கும் பரிசுகள் கொடுத்தாகிவிட்டது; அனுமனுக்கு ஏதாவது கொடுக்க வேண்டும் என்று சீதைக்கு அவா. இராமபிரானைப் பற்றிய செய்தி கொண்டுவந்து உயிர் காத்த உத்தமன் அல்லவா அனுமன்? சிந்தனை வயப்பட்டவளாய் இராமனைப் பார்க்கிறாள் சீதை; இராமனும் கண்களாலேயே உத்திரவு கொடுக்கிறான். தன் கழுத்தில் இருந்த மணி மாலை கழற்றி அனுமனின் கையில் கொடுக்கிறாள் சீதை. பார்வையிலேயே ஒருவரையொருவர் புரிந்து கொள்ளும் பக்குவம் இராமனுக்கும் சீதைக்கும் இருந்தது.

மலரின் மணம் போல, தேனின் சுவை போல இருக்க வேண்டும் காதல். ஆனால் இப்போது நாம் கேள்விப் படும் காதல் என்பதன் பொருளே வேறு மாதிரி ஆகிவிட்டது. இந்த நாளைப் பற்றி நினைக்கும்போது எனக்கு மறைந்த நடிகர் சந்திர பாபுவின் பாடல் ஒன்று நினைவுக்கு வருகிறது.

“காதல் என்பது எதுவரை? கல்யாணக் காலம் வரும்வரை…”

அவர் காலத்திலேயே இப்படி என்றால் இப்போது கேட்கவே வேண்டாம்!

“ஏங்க, காதலுக்கு மரியாதை, காதல் கோட்டை முதலிய படங்களை நீங்கள் பார்த்ததில்லையா?” என்று கேட்கிறீர்களா? அந்தப் படங்கள் என்னவோ வெற்றிப் படங்கள் தான்; மக்களும் கூட்டம்கூட்டமாக போய்ப் பார்த்தார்கள்; ஆனால் இப்படங்களில் சொல்லப்பட்ட கருத்துக்களை எத்தனை பேர் பின்பற்றினார்கள்?

காதல், காதல், காதல், காதல் இல்லையேல், சாதல் என்றார் பாரதியார்

மனிதனின் வாழ்வில் காதல் என்னும் அன்பு இல்லை என்றால் அவனது வாழ்வு அர்த்தம் இல்லாதது; கிட்டத்தட்ட உயிரில்லாதவனைப் போன்றவன் அவன் என்று இதற்கு நாம் பொருள் கொள்ளலாம். ஆனால் பள்ளி செல்லும் சிறுவர் சிறுமியர் காதலிப்பதும் காதலில் தோல்வி என்றாலோ  அல்லது பெற்றோர்கள் இதுபற்றி தெரிந்து கோபித்துக் கொண்டாலோ உடனே தூக்கில் தொங்குவதும், விஷம் குடித்து உயிரை விடுவதும்…. காதலைப் பற்றிய எண்ணமே மாறிவிடுகிறது, இல்லையா?

சரி இப்போது ஒரு கதை.. காதல் கதைதாங்க! ஒரு இணைய தளத்தில்     (பி)படித்தது.

வெகு காலத்திற்கு முன், மகத தேசத்தில் அகல்யா என்றொரு அழகான பெண் இருந்தாள். அரசனுக்கு அவள் மேல் ஆசை. ஆனால் அவளுக்கோ இந்திரன் என்கிற இளைஞன் மேல் ஆசை; அவனுக்கும் அப்படியே. எத்தனையோ ரகசியாமாக வைத்திருந்தும் ஒரு நாள் அரசனுக்கு அவர்களின் காதல் தெரிந்து விடுகிறது. தனக்கு அகல்யா கிடைக்காத கோபத்தை அவர்கள் இருவரையும் தண்டிப்பதில் தீர்த்துக் கொண்டான்.

முதலில் அவர்கள் இருவரையும் பனிக் காலத்தில் எலும்புகளை உறைய வைக்கும் நீரில் தள்ளினான். காதலில் மூழ்கி இருந்த அவர்களுக்கு அது ஒரு பொருட்டாகவே இல்லை. மகிழ்ச்சியில் சிரித்துக் கொண்டிருந்தனர்.

“நீ எத்தனை கடுமையாக தண்டித்தாலும், நாங்கள் எங்களைப் பற்றிய நினைவுகளில் மூழ்கி இருப்பதால், உடல் துன்பம் பெரிதாகத் தெரியவில்லை”. என்றனர்.

கொதிக்கும் எண்ணெய் கொப்பரையில் இருவரையும் போட்டான்; “எங்களைப் பற்றிய தியானத்தில் ஆழ்ந்து விட்டோம்; வலியை உணரவில்லை” என்றனர்.

யானையின் கால்களில் இருவரையும் கட்டி யானையை ஓட விட்டான். “இருவருக்கும் இடையே இருக்கும் ஈர்ப்பு, எல்லையில்லா ஆனந்தத்தை தருகிறது; உடல் துன்பம் பெரிதல்ல” என்றனர்.

சாட்டையால் அடித்தும் இரும்புக் கம்பிகளால் உடல் முழுவதும் துளைத்தும் இன்னும் எப்படி எப்படியோ துன்புறுத்தியும், அரசன் தான் அசந்து போனானே ஒழிய இளம் காதலர்கள் அயரவே இல்லை. “நீ கொடுத்த தண்டனை எல்லாம் எங்கள் உடலைத்தான் பதம் பார்த்தன; எங்கள் காதலை அல்ல” என்று சொன்னார்கள்.

வேறு வழி தெரியாத அரசன் பாரத முனிவரிடம் அந்தக் காதலர்களை அவரது சாபத்தால் அழியும்படி செய்தான். உடல்கள் தான் அழிந்ததே தவிர உள்ளமோ, ஆத்மாவோ அல்ல.

அகல்யாவும், இந்திரனும் முதலில் பின்னிப்பிணைந்த புழுக்களாக பிறந்தனர். பின்பு முத்தமிடும் மீன்களாகப் பிறவி எடுத்தனர். அடுத்து ஜோடிப் புறாக்களாக பிறந்து, வான் வெளியில் ஆனந்தமாய் பறந்து திரிந்தனர். அடுத்த பிறவியில் ஜோடி மான்களாய் பச்சைப் புல்வெளியில் பாடித் திரிந்தனர்.

கடைசியில் ஆணும் பெண்ணுமாய் இந்த பூவுலகில் வந்து பிறந்தனர்.

கதையின் நீதி என்ன?

மனம் தான் எல்லாவற்றிற்கும் ஆதாரம்; உடல் அதன் வெளிப்பாடு; அவ்வளவு தான். இரண்டு மனங்கள் இணைந்துவிட்டால் யாராலும், மரணத்தாலும் கூட அவற்றை பிரிக்க முடியாது.

இரண்டு தனிநபர்கள் மனத்தால் இணைந்து இத்தனை துன்பங்களை தாங்கிக் கொள்ளமுடியும் என்றால், ஒரு நிமிடம் யோசியுங்கள் நீங்கள் உங்கள் மனத்தைக் கடவுளிடம் இணைத்து விட்டால் என்னதான் நடக்காது?

இப்படி ஒரு க்ளைமேக்ஸ் உடன் முடிகிறது இந்தக் காதல் கதை!

இந்தக் கதையில் நான் என்ன சொல்ல வருகிறேன் என்று கேட்கிறீர்களா?

என்ன புரிந்து கொள்ளுகிறீர்களோ, அது உங்கள் பாடு…. நான் எஸ்கேப்!

 

 

published in a2ztamilnadunews.com

ஸ்டீஃபன் ஹாகிங்

 ஸ்டீஃபன் ஹாகிங் 

 பிரிட்டீஷ் விஞ்ஞானியான இவருக்கு ஜனவரி மாதம் 8 ஆம் தேதி 70 வயதாகிறது. நம்  பிரபஞ்சத்தைப் பற்றிய குழப்பமான பல புதிர்களை விடுவித்திரிக்கிறார் இவர். ஆனால் இவரது வாழ்க்கை  புதிர் மட்டும் யாருக்குமே புரிவதில்லை. மிகபெரிய புதிர் இவர் எப்படி இத்தனை வருடங்கள் உயிர் பிழைத்து இருக்கிறார் என்பதுதான்!

ஸ்டீஃபன் ஹாகிங், கலிலியோ இறந்து சரியாக 300 ஆண்டுகள் ஆன பின், அதே நாளில் 1942 ஜனவரி 8 ஆம் தேதி இங்கிலாந்து நாட்டிலுள்ள ஆக்ஸ்போர்ட் என்னும் ஊரில் பிறந்தார். 1963 இல் கேம்பிரிட்ஜ் பல்கலைக் கழகத்தில் பி.எச்.டி. பண்ணிக்கொண்டிருந்த போது மோட்டார் நியூரான் டிசீஸ் (Motor Neurone disease)  எனப்படும் வியாதியால் பாதிக்கப்பட்டிருப்பதாக தெரிய வந்தது. இந்த வியாதி மெது மெதுவே கை, கால்களில் உள்ள தசைகளை செயலிழக்கச் செய்துவிடும். முகம், கழுத்து முதலிய தசைகளையும் இந்த நோய் தாக்கும்போது பேச்சுத் திறன் பாதிக்கப்படும். சாப்பிட உணவு மூச்சுக் குழலுக்குள் போய் விடும் அபாயம். ஆக மொத்தத்தில் இந்த வியாதி ஒரு மனிதனை கொஞ்சம் கொஞ்சமாக அழித்துவிடும். இந்த நோய் வந்தவர்கள் மூச்சு விட ஒரு கருவி, உணவு செலுத்த இன்னொரு கருவி என்று வைத்துக் கொண்டு வாழலாம் அதுவும் சில வருடங்களுக்கு மட்டுமே.மருத்துவர்கள் இவருக்கு விதித்த இரண்டு வருட கெடுவையும் தாண்டி இவர் இன்னுமும் வாழ்ந்துவருகிறார் அதுவும் வெண்டிலேடர்களின் உதவி இல்லாமலே என்பது இவர் ஆராய்ச்சி செய்துள்ள Black Hole theory, Big Bang theory களைக் காட்டிலும் புதிரானது, அதிசயத்திலும் அதிசயமானது என்றே பல ஆராய்ச்சியாளர்களும் கருதுகிறார்கள்.

1965 இல் ஜேன் வைல்ட் என்பவரை மணந்துகொண்ட இவருக்கு மூன்று குழந்தைகள். 1979 இல் கேம்பிரிட்ஜ் யுனிவெர்சிடியில் லூகேசியன் புரொபசர் ஆப் மேதமேடியஷியன் (Lucasian professor of methamatician) ஆக நியமிக்கப்பட்டார். இது  சர் ஐசக் நியூட்டன் வகித்த பதவியாகும். சுமார் 30 வருடங்கள் இந்தப் பதவியில் இருந்த இவர்  2009 இல் ஒய்வு பெற்றார்.

1979 இல் நிமோனியா நோயினால் பாதிக்கப்பட்டார். அப்போது டிரசியோடமி (tracheotomy) என்கிற ஆபரேஷன் செய்யப்பட்டதால் பேசும் திறனை இழந்துவிட்டார். அன்று முதல் ஒரு கணனியையும் (speech synthesizer)  அதனுடன் ஒரு வாய்ஸ் சிந்தசைசெரரையும் (voice synthesizer) இணைத்து அதன் மூலம் பேசிவருகிறார்.

1988 இல் நாம் வாழும் இந்தப் பிரபஞ்சத்தைப் பற்றி வெகு எளிதாகப் புரியக் கூடிய வகையில் ‘A Brief History of Time’ என்ற புத்தகத்தை எழுதி வெளியிட்டார்.  10 மில்லியன் பிரதிகள் விற்பனையான இந்தப் புத்தகத்தின் மூலம் அறிவியல் உலகில் எல்லோருடைய கவனத்தையும் கவர்ந்தார்  ஸ்டீஃபன் ஹாகிங்.

தற்சமயம் கேம்பிரிட்ஜ் யூனிவர்சிட்டியின் சென்டர் ஃபார் தியரிடிகல் காஸ்மாலஜி துறையின் இயக்குனராக இருந்து வருகிறார்.  1970 ஆம் ஆண்டிலிருந்து ஒரு சக்கர நாற்காலியிலேயே முடங்கி இருக்கும் இவர் இத்தனை சாதனைகளைப் புரிந்திருக்கிறார்!

‘மனித குலத்தின்எதிர்காலம் இனி விண்வெளியில் தான்’ என்று சொல்லும் இவர் அதை நிரூபிப்பது போல 2007 இல் ஓர் ஜீரோ க்ராவிடி விமானத்தில் பயணித்தார். முதல் முதலாக தன்னுடைய சக்கர நாற்காலியிலிருந்து சுமார் நாற்பது வருடங்களுக்குப் பின் இந்தப் பயணத்தின் போது தான் வெளியே வந்தார் ஸ்டீஃபன் ஹாகிங்.

சமீபத்தில் ஒரு பேட்டியில் இவர் கூறியது: “எனக்குப் புரியாத புதிர்: பெண்கள்!”

 

 

 

published in a2ztamilnadunews.com

லீப் வருடம் – பல சுவையான தகவல்கள்:

லீப் வருடம் – பல சுவையான தகவல்கள்:

நீங்கள் உங்கள் ‘பொன்னான பிறந்த’ (Golden Birthday) நாளைக் கொண்டாடி இருக்கிறீர்களா?

‘பொன்னான பிறந்த நாளா?’ என்று வியப்பவர்களுக்கு: உங்கள் பிறந்த தேதியும், உங்கள் வயதும் ஒன்றாக இருந்தால்   (அதாவது 27 ஆம் தேதி உங்கள் 27 வது பிறந்தநாள் வந்தால் அதுதான் உங்களது ‘பொன்னான பிறந்த நாள்’. 1953 ஆம் ஆண்டில் பிறந்தவர்கள் தங்களது 53 வது பிறந்த நாளை ‘பொன்னான பிறந்த நாளா’ கக் கொண்டாடலாம்.

சரி லீப் வருடத்தில் பிப்ரவரி 29 ஆம் தேதி பிறந்தவர்கள் எப்போது தங்களது ‘பொன்னான பிறந்த நாளை’ கொண்டாடுவார்கள்? யோசியுங்கள்….. விடை கடைசியில்…….

ஒரு வருடத்தின் எண்களை மிகுதி இல்லாமல் 4 ஆல் வகுக்க முடிந்தால் அது தான் லீப் வருடம் என்று தெரியும்.தெரியாத விஷயம்: நூற்றாண்டுகள் வரும்போது அவை 400 ஆல் மிகுதி இல்லாமல் வகுக்கப் பட வேண்டும் என்பது!

லீப் வருடமும் பலவிதமான காலண்டர்களும்:

பூமி சூரியனை ஒரு முறை சுற்றி வர 365 நாட்கள் ஆகிறது. துல்லியமாக சொல்ல வேண்டுமானால் 365.242 நாட்கள்  அதாவது 365 1/4 நாட்கள். எகிப்தியர்கள் மாறி வரும் பருவ நிலைகளும் தங்கள் நாட்காட்டியும் பல சமயங்களில் ஒத்துப் போகாததை கண்டறிந்தனர்.

  • முதன் முதலில் இந்தக் கால் நாளை ஒரு நாளாக்கி நான்கு வருடங்களுக்கு ஒரு முறை காலண்டரில் சேர்த்த பெருமை கி.மு. 45 இல் வாழ்ந்த ரோமானிய அரசர் ஜூலியஸ் சீசரைச் சேரும்.
  • நாம் இப்போது பயன் படுத்தும் க்ரிகோரியன் (Gregorian) காலண்டர், ஜூலியஸ் சீசர் வடிவமைத்த காலண்டரின் லீப் வருடத்தை உள்ளடக்கிய காலண்டர் தான்.
  • ஸ்வீடனில் 1712 ஆம் ஆண்டு பிப்ரவரி மாதத்திற்கு 30 நாட்கள்! காரணம் அங்கு அப்போது ஜூலியன் காலண்டரோ அல்லது க்ரிகோரியன் காலண்டரோ நடைமுறையில் இல்லாததுதான். அதன் பிறகு 1753 க்ரிகோரியன் காலண்டரை பின்பற்றி அமைக்கப் பட்ட காலண்டரில் லீப் வருடம் பிப்ரவரி 17 ஆம் தேதிக்குப் பிறகு மார்ச் 1 ஆம் தேதிக்குத் தாவியது. ஆனால் பொதுமக்களுக்கு இந்த முறை பிடிக்கவில்லை; தங்கள் வாழ்நாளிலிருந்து 10 நாட்களைஇழந்து  விட்டதாக நினைத்தனர்!
  • 1930 களில் சோவியத் யூனியனிலும் பிப்ரவரி 30 தேதியுடன் இருந்த காலண்டர் புழக்கத்தில் இருந்தது. தொழிலாளிகளின் உற்பத்தித் திறனைப் அதிகரிக்க ஒவ்வொரு மாதமும் 7 நாட்களாக ஞாயிறு விடுமுறை) இருந்த வாரக் கணக்கை மாற்றி 5 அல்லது 6 நாட்கள் தொடர்ச்சியாக விடுமுறை இல்லாத வேலை நாட்களாக அறிவிக்கப்பட்டன. ஒவ்வொரு மாதத்திற்கும் 30 நாட்கள்! மிச்சமிருந்த 5 அல்லது 6 நாட்கள் மாதக் கணக்கில்வராத தேசீய விடுமுறை நாட்களாக அறிவிக்கப்பட்டன. ஆனால் ஞாயிறு விடுமுறை என்ற வழக்கம் நெடு நாட்களாக இருந்ததால்,இந்த முறை, அதிக நாட்கள் நீடிக்க முடியவில்லை; 1940 ஆம் ஆண்டு பழையபடி க்ரிகோரியன் காலண்டர் பழக்கத்திற்கு வந்தது.

பழங்காலத்தில் லீப் வருடம்: 

  • முற்காலத்தில் ஒரு பெண் தன் மனதுக்குப் பிடித்தவனை தேர்ந்தெடுக்க லீப் வருடமே சிறந்தது என்று கருதப் பட்டது. லீப் வருடத்தில் ஒரு பெண் தன் காதலைச் சொல்லலாம் என்று 5 ஆம் நூற்றாண்டில் அயர்லாந்து நாட்டில் ஒரு வழக்கம் இருந்ததாம். 13 ஆம் நூற்றாண்டில் இதை அரசு பூர்வ சட்டமாக மாற்றியவர் ஸ்காட்லாந்து ராணி மார்கரெட்.
  • ஒரு பெண் லீப் வருடத்தில் தன் காதலை சொல்லி அதை ஏற்க மறுக்கும் ஆண் மகன் அவளுக்கு புதிதாக பட்டு உடையும் ஒரு ஜோடி கையுறையும் கொடுக்க வேண்டும் என்ற வழக்கமும் இருந்ததாம்.
  • சில நாடுகளில் லீப் வருடம் அமங்கலமான வருடமாக கருதப்பட்டது. ஸ்காட்லாந்து நாட்டில் லீப் வருடத்தில் பிறக்கும் குழந்தை அதிர்ஷ்டம் இல்லாத குழந்தையாகக் கருதப் பட்டது. கிரேக்க நாட்டில் இன்னும் ஒரு படி மேலே போய் லீப் வருடத்தில் கல்யாணம் செய்து கொள்ளுவதையே தவிர்த்தனர்.

லீப் வருடமும் சினிமாவும்:

  • அயர்லாந்து நாட்டில் பழைய காலத்தில் இருந்த வழக்கத்தை அடிப்படையாக வைத்து 2010 ஆம் ஆண்டு ‘லீப் இயர்’ (Leap Year) என்ற நகைச்சுவைப் படம் வெளியானது. தன் மனதுக்குப் பிடித்தவனை ‘ப்ரொபோஸ் ‘ செய்ய அயர்லாந்துக்கு பிரயாணம் செய்யும் ஒரு பெண்ணின் கதையை நகைச்சுவையுடன் விவரிக்கிறது இப்படம்.
  • 19 ஆம் நூற்றாண்டு வெளி வந்த ‘The Pirates of Pinzance” என்கிற நகைச் சுவை இசை நாடகம், கப்பற் கொள்ளைக்காரனான ஒரு இளைஞன் பற்றியது. வேலைக்குச் சேர்ந்தவுடன் அவனது பயிற்சி பருவம் (apprenticeship) அவனது 21 வயது வரை என்று நிர்ணயிக்கப் படுகிறது. முதலில் மகிழ்ச்சி அடையும் அவன் தன் பிறந்த நாள் பிப்ரவரி 29 என்பதை உணர்ந்து அதிர்ச்சி அடைகிறான்! 84 வயதில் தான் அவனது 21 வது பிறந்த நாள் வரும்!

சராசரியாக 1461 குழந்தைகளில் ஒரு குழந்தை மட்டுமே இந்த லீப் வருடம் பிப்ரவரி 29 ஆம் தேதி பிறக்கும் பாக்கியத்தைப் பெறுகிறது.

இக்குழந்தைகள் ‘Leaplings’ என்று அழைக்கப் படுகின்றனர். இவர்கள் ஒவ்வொரு வருடமும் தங்கள் பிறந்தநாளின் கால் பகுதியைத்தான் கொண்டாடுகிறார்கள். பிறந்த தேதி வராத வருடங்களில் பிப்ரவரி 28 அல்லது மார்ச் 1 ஆம் தேதி தங்கள் பிறந்த நாளைக் கொண்டாடுகின்றார்.

  • பிப்ரவரி 29 ஆம் தேதி பிறந்த நம்மூர் பிரபலங்கள்: மறைந்த பிரதமர் மொரார்ஜி தேசாய் மற்றும் நடனக் கலைஞா் ருக்மிணி தேவி.
  • உலகப் புகழ் பெற்ற சூப்பர் மேன் பிறந்தது இதே பிப்ரவரி 29. இவரது 50 வது பிறந்த நாளை ‘டைம்ஸ்’ பத்திரிக்கை 1988 ஆம் ஆண்டு தனது அட்டைப் படத்தில் சூப்பர் மேனைப் பற்றிய விவரங்களை வெளியிட்டு கொண்டாடியது.
  • ஆஸ்திரேலியாவில் உள்ள தாஸ்மேனியா பிரதமர் சர் ஜேம்ஸ் வில்சன் பிறந்தது, இறந்தது இரண்டுமே பிப்ரவரி 29 ஆம் தேதிதான்!

2012 லீப் வருடம் என்று எல்லோருக்கும் தெரிந்த விஷயம் தான். இந்த ஆண்டின் தெரியாத விசேஷங்கள்:

  • இந்த ஆண்டு பிப்ரவரி 29 ஆம் தேதி இந்தியா உட்பட உலகின் பல நாடுகளில் Rare Disease Day யாக கடை பிடிக்க உள்ளனர். குணப்படுத்த முடியாத, அரிதான, நோய்களை ‘rare disease’ என்கிறார்கள். இந்நோய்களைப் பற்றிய விழிப்புணர்வு நாளாக பிப்ரவரி 29 ஆம் தேதி அறிவிக்கப் பட்டுள்ளது.
  • அமெரிக்காவின் டிஸ்னி லாண்ட் இந்த வருடத்தில் வரும் ஒரு அதிகப் படியான நாளைக் கொண்டாட 29 ஆம் தேதி 24 மணி நேரமும் திறந்திருக்கும்.

சரி, இப்போது முதலில் கேட்ட கேள்விக்கு பதில் பார்ப்போமா? பிப்ரவரி 29 இல் பிறந்தவர்கள் தங்கள் பொன்னான பிறந்தநாளை தங்களது 116 வது வயதில் கொண்டாடுவார்கள்!!!!

published in a2ztamilnadunews.com

முழங்கால் வலி

முழங்கால் வலி
முழங்கால் வலி  ஒரு உலகளாவிய நோய். எல்லா வயதினரையும்,  ஆண், பெண் இருபாலரையும் பாதிக்கும் நோய்.

இந்நோய்க்கு காரணங்கள்

  • அலுவலகத்தில் பல மணி நேரம் ஒரே இடத்தில் உட்கார்ந்து வேலை செய்வது;
  • வேலையில் ஏற்படும் மன அழுத்தம்;
  • உடல் பருமன்;
  • போதுமான உடற்பயிற்சி இல்லாத வாழ்க்கை.

இந்நோய்க்கு  மருந்து என்று சொன்னால் வலி நிவாரணிகளும், வலியினால் உண்டாகும் வீக்கம் குறைய கொடுக்கப்படும் மருந்துகளும் தான். இவைகள் ஆரம்பத்தில் வலி, வீக்கம் குறைய உதவினாலும் நீண்ட காலத் தீர்வு கொடுப்பதில்லை.
இந்த முழங்கால் வலி வராமல் தடுக்கவும், வந்து விட்டால் இது தரும் தாங்க முடியாத வலியிலிருந்தும் காத்துக் கொள்ள முடியாதா? முடங்கின முழங்கால்களை மறுபடி செயல் பட வைக்க முடியாதா? இந்த நோயினால் அவதிப் படும் ஒவ்வொருவரும் கேட்கும் கேள்வி இது. சரியான கேள்வி தான். ஆனால் இந்நோய் வந்தவுடன் பெரும்பாலோர் செய்வது என்ன தெரியுமா?

“முட்டி வலி தாங்க முடியவேயில்லை. மாடிப்படி ஏறுவது இறங்குவது பெரிய பாடாக இருக்கிறது” என்று சொல்லிக் கொண்டு ஒரேயடியாக இவற்றை செய்வதை தவிர்த்துவிடுகிறார்கள். இது மட்டுமல்ல; கால்களை மடக்கி தரையில் உட்கார்ந்து கொள்ளுவதையும் விட்டு  விடுகிறார்கள். தங்கள் வீட்டில் இருக்கும் இந்திய பாணி கழிப்பறையை மேற்கத்திய பாணிக்கு மாற்றிவிடுகிறார்கள். இன்றைய கால கட்டத்தில் நாம் நம் கைகளையும் கால்களையும், இதர மூட்டுக்களையும் மிக மிக கொஞ்சமே பயன் படுத்துகிறோம். வலி என்று சொல்லி அதையும் தவிர்க்கப் பார்க்கிறோம். இது தவறு அல்லவா? சரி இப்படி செய்வதால் வலி இல்லாத வாழ்வு கிடைக்கிறதா இவர்களுக்கு என்றால், அதுவும் இல்லை. சரி இதற்கு என்ன தீர்வு?

ஒரு விஷயம் நாம் நினைவில் கொள்ளவேண்டும். நமக்கு வலி வருவதே நம் உறுப்புகளை நாம் சரிவர பயன் படுத்தாததுதான்.

அதனால் நன்றாக திட்டமிடப்பட்ட உடற்பயிற்சி; அதை விடாமல் செய்யக் கூடிய உறுதியான மனம் இரண்டும் தான் இந்த வலியிலிருந்து விடுதலை கொடுக்கும்.

முதலில் நம் முழங்கால்களின் அமைப்பைப் பார்க்கலாம்: உள் தொடை, முன் தொடை, பின் தொடை வெளித் தொடை என்ற நான்கு தசைகள்; முழங்கால் மூட்டுக்களின் பின் புறமிருந்து ஆரம்பமாகும் ஆடுதசை ஆகிய ஐந்து ‍வகையான பெரிய தசைகளினால் தாங்கப் படும் ஒரு கூட்டமைப்பு தான் நம் முழங்கால்கள்.

இந்த தசைகளின் நெகிழ்வுத் தன்மையையும், செயல் திறனையும் உறுதிப் படுத்தும் வகையில் ஒரு ஒட்டு மொத்த அணுகு முறையுடன் கூடிய பயிற்சிகளை ஒரு நிபுணரின் மேற்பார்வையில் செய்ய வேண்டும். இதற்கு 4 முக்கியமான பயிற்சிகள் தேவை:

  • Stretching: எனப்படும் நீட்சி பயிற்சிகள்;
  • Flexibility:  பாதிக்கப்பட்ட தசைகளின் நெகிழ்வுத் தன்மையை மறுபடி மீட்டு எடுப்பதற்கான பயிற்சிகள்;
  • Strengthening: இழந்து போன வலுவை மீண்டும் பெற உதவும் பயிற்சிகள்;
  • Functionality: செயல் திறனை மீட்கச் செய்யப்படும் பயிற்சிகள் – வலியினால் நிறுத்தி வைத்திருந்த வேலைகளை நிதானமாக செய்ய ஆரம்பிப்பது தான் இப் பயிற்சி;

முதலில் இந்த தசைகளை நன்றாக நீட்டி (stretching) பழக்க வேண்டும்.  நீங்களாகவே முடிந்த அளவு நீட்டி மடக்கி பழக வேண்டும். நீட்சி பயிற்சியிலேயே நெகிழ்வுத் தன்மையும் வந்து விடும். ஓரளவு பழைய நிலைக்குத் திரும்பியபின் உறுதிப் பாட்டுக்கான பயிற்சிகளை மேற்கொள்ள வேண்டும். சிறிது காலம் ஆனபின் முழங்கால் வலி வருவதற்கு முன் என்னென்ன வேலை செய்து கொண்டு இருந்தீர்களோ மெல்ல மெல்ல அவைகளை செய்யத் தொடங்குங்கள்.

நாம் சின்ன வயசில் கற்றுக் கொண்ட நர்சரி பாடல்கள் நமக்கு இன்றைக்கும் மறப்பதில்லை, அல்லவா? அது போலத்தான் நாம் ஏற்கனவே செய்து வந்த வேலைகள்  நம் உடலுக்கும் நினைவிருக்கும். அதனால் தினம் தினம் கொஞ்சம் கொஞ்சமாக நிறுத்தி வைத்திருந்த வேலைகளை செய்ய ஆரம்பியுங்கள்.

முதலில் 5 நிமிட நடைப் பயிற்சி; பிறகு 10 நிமிடங்கள்; அதே போல ஒரு நாளைக்கு 5 நிமிடம் தரையில் உட்காருங்கள்; டீ.வி. பார்க்கும்போது சாப்பிடும்போது என்று கீழே உட்கார்ந்து பழகுங்கள். நிதானமாக நேரத்தைக் கூட்டுங்கள். தினமும் ஒரு முறை மாடிப் படி ஏறுங்கள். அல்லது இறங்குங்கள். நாட்கள் செல்லச்செல்ல உங்களையும் அறியாமல் பழைய நிலைக்கு வந்து விடுவீர்கள்.

சில சமயங்களில் கீழ் முதுகில் ஏற்படும் விறைப்பு (stiffness) முதலியவற்றாலும் கூட முழங்கால்கள் பாதிக்கக் கூடும். அப்போது கீழ் முதுகு உறுதிப் படத் தேவையான பயிற்சிகளை மேற்கொள்ளவேண்டும்.

மிக முக்கியமான விஷயம்: ஒரு நாள் உடற்பயிற்சி செய்துவிட்டு ஒன்பது நாள் சும்மா இருக்கக் கூடாது. உடற்பயிற்சி என்பதை தினமும் செய்ய வேண்டிய கட்டாய வேலையாக வைத்துக் கொள்ள வேண்டும். வலிக்கிறது என்று பயிற்சியை விடாமல் நல்ல பயிற்சியாளரின் வழி காட்டுதலுடன் செய்தால் பழைய நிலைக்கு திரும்பலாம் என்கிறார்கள் மருத்துவர்கள்.

வலியுடனேயே பயிற்சி செய்ய வேண்டுமா என்று எண்ணாமல் வலி போகத்தான் இப் பயிற்சிகள் என்று நினைக்க ஆரம்பித்தால் உடலும் ஒத்துழைக்கும்; ஆரோக்கியம் பெருகும். செய்வோமா?

 

 

 

published in arusuvai.com on 21.3.2012

வெண்டைக்காயின் மருத்துவ குணங்கள்:

வெண்டைக் கையின் மருத்துவ குணங்கள்:

“பையன் கணக்கில் ரொம்ப வீக்.”
“வெண்டைக்காய் சாப்பிடச் சொல்லுங்கள். கணித மேதை ராமானுஜம் கூட இதைதான் சாப்பிட்டாராம்”
பையன்: “ஆமா, இவர்தான்  நேர தோட்டத்தில் இருந்து பறிச்சுக் கொடுத்தாப்பல …….”
சரி, சரி, விஷயத்திற்கு வருவோமா?கணிதத்தை தவிர வேறு சில நன்மைகளும் வெண்டைக்காய் சாப்பிடுவதால் வரும்
என்று சொல்லத்தான் இந்தக் கட்டுரை.அரை கப் வேகவைத்த வெண்டைக்காயில் இருக்கும் சத்துக்கள்:
கலோரிகள்: 25 kcal
நார் சத்து: 2 gm
புரத சத்து: 1.5 gm
கார்போஹைடிரேட்: 5.8 gm
வைட்டமின் A : 460 IU (international unit)
வைட்டமின் C :13 mg
போலிக் அசிட் :36 .5 micrograms
கால்சியம் 50 mg
அயர்ன் : ௦.4 mg
பொட்டாஷியம் : 256 mg
மேக்னிஷியம் : 46 mg”இந்த வழ வழ கொழ கொழ வெண்டைக்காயை யார் சாப்பிடுவார்கள்?” என்று கேட்கும் ஆசாமியா நீங்கள்? இல்ல அண்ணாச்சி அப்படி இல்ல! உங்களுக்குத் தான் இந்த செய்தி:
வெண்டைக்காயின் வழ வழ கொழ கொழாவுக்குக்  காரணம் அதில் இருக்கும் gum மற்றும் pectin. இவை இரண்டும் ஜாம் மற்றும் ஜெல்லி களில் அவை கெட்டி படுவதற்காக பயன்படுத்தப் படுகின்றன. ஆப்பிள்,, ஆரஞ்சு பழங்களின் மேல் தோலில் பெக்டின் காணப் படுகிறது. இவையிரண்டும் சொல்யுபில் பைபர் (soluble fiber) அதாவது கரையக் கூடிய நார்சத்து.  இவை சீரம் கொலஸ்ட்ரால்(serum cholesterol) -ஐ குறைப்பதுடன் மாரடைப்பு நோய் வருவதையும் குறைக்கின்றன. வெண்டைக்காயில் பாதிக்கு மேல் சொல்யுபில் பைபர் இருக்கிறது. மறு பாதியில் இன் சொல்யுபில் பைபர் (insoluble fiber) அதாவது உணவு செரிமானத்திற்கு பின் கரையாதது. இந்த வகை நார் சத்து குடலை ஆரோக்கியமாக வைக்கிறது. மலக்குடலில் உண்டாகும் புற்று நோய் வராமல் காக்கிறது.
  • வெண்டைக் காயில் இருக்கும் உயர்ந்த வகை நார் சத்து இரத்தத்தில் சர்க்கரையின் அளவை ஒரே நிலையில் வைக்க உதவுகிறது.
  • வெண்டைக் காயில் இருக்கும் கோந்து (gum) கொலஸ்ட்ராலை கட்டுப் படுத்தி  பித்த அமிலத்தால் எடுத்து செல்லப்படும் நச்சுப் பொருட்களை வடிகட்டவும் உதவுகிறது.
  • எல்லா நோய்களும் பெருங்குடலில் தான் உருவாகின்றன. வெண்டைக் காயில் இருக்கும் நார் சத்துக்கள் நீரை உறிஞ்சி
    அதிக மலம் வெளியேற உதவுவதால் மலச் சிக்கல் தடுக்கப்படுகிறது.
  • பல உணவுப் பொருட்களில் நார் சத்து இருந்தாலும், வெண்டை காயில் இருக்கும் நார் சத்தானது ஆளிவிதை (flax seed) யில் இருக்கும் நார் சத்துக்கு சமமாக கருதப் படுகிறது.
  • கோதுமைத் தவிட்டில் இருக்கும் நார் சத்து வயிற்றை எரிச்சல் படுத்துவதுடன் குடலையும் புண்ணாக்கி விடுகிறது. ஆனால் வெண்டை காயில் இருக்கும் கொழ கொழ சத்து குடலுக்கு இதத்தை அளிப்பதுடன், வேண்டாத கழிவுகளை வெளியேற்றவும் உதவி செய்கிறது.
  • மேற் சொன்ன செயல்களைப் புரிவதால் இந்த அற்புதமான கறிகாய் பல நோய்கள் நம்மை அண்டாமல் தடுக்கிறது.
  • எந்த விதமான நச்சுப் பொருட்களும் இதில் இல்லவே இல்லை. சாப்பிடுவதால் பக்க விளைவுகளும் கிடையாது. சுலபமாக குறைந்த விலையில் கிடைக்கிறது.
  • நம் உடலில் இருக்கும் நல்ல பாக்டீரியா கிருமிகளையும் ஊக்குவிக்கிறது.

இதில் இருக்கும் போஷாக்குகள் முழுவதும் நமக்குக் கிடைக்க வேண்டுமானால் இதை கொஞ்சமாக சமைக்க வேண்டும். மிதமான தீயில் அல்லது ஆவியில் வேகவைப்பது நல்லது. சிலர் இதனைப் பச்சையாகச் சாப்பிடுகிறார்கள்.

நீரிழிவு நோய் உள்ளவர்கள் தினமும் இரவு ஒரு இளம் வெண்டை காயை நீரில் ( மேல் அடிக் காம்புகளை நீக்கிவிட்டு)ஊறப் போட்டு அதிகாலை எழுந்தவுடன் அந்நீரைக் குடித்துவிட்டு காயையும் மென்று தின்ன வேண்டும். தொடர்ந்து செய்தால் சர்க்கரை நோயின் தீவிரம் குறையும்.

அசிடிட்டி இருப்பவர்கள் தினமும் 6 வெண்டைக் காய்களை சாப்பிட்டு வந்தால் அசிடிட்டி குறையும்.

கடைசியாக ஒரு வார்த்தை: நீங்கள் சில நோய்களுக் காக தினமும் மருந்து சாப்பிடுபவர் என்றால் உங்கள் மருத்துவரிடம் ஆலோசனை பெற்று பின் இந்தக் குறிப்புகளைப் பின் பற்றவும். மொத்தத்தில் வெண்டை காய் சாப்பிடுவது நல்லது என்று சொல்லுவதுதான் இக் கட்டுரையின் நோக்கம். ஆனால் மருந்தாக பயன் படுத்த வேண்டுமானால் மருத்துவரை அணுகவும்

publishded in a2ztamilnadunews.com